Жетісу облысында Ұлттық кітап күні ерекше рухани серпіліспен басталды. Атаулы күн аясында «Жетісудың рухани қазынасы» атты кең көлемді көрме ұйымдастырылып, Талдықорған қаласы тұрғындарына түрлі әдеби-мәдени іс-шаралар ұсынылды.
Көпшілік назарына қиял-ғажайып ертегілер, тарихи шығармалар мен ұлт тұлғалары туралы жазылған ғұмырнамалар қойылып, кітапсүйер қауым өзіне ұнаған кітаптарды оқып, сатып алу мүмкіндігіне ие болды. Сонымен қатар, орталық сахнада жыр сүйер қауым елге танымал ақындардың өлеңдерін жатқа айтып, рухани кештің сәнін кіргізді.
«Биыл Ұлттық кітап күні айрықша аталып өтуде. Облыс көлемінде 200-ден астам, жалпы 300-ге жуық іс-шара өткізіп жатырмыз», — дейді С.Сейфуллин атындағы облыстық кітапхана директоры Самал Шаяхметова.
Жастар арасында ел тарихына қатысты викториналар ұйымдастырылып, дұрыс жауап бергендерге кітаптар сыйға тартылды. Өнерпаздар оркестр сүйемелдеуімен әсем ән шырқап, көрермендерге ерекше көңіл-күй сыйлады.
«Ұлым мен қызым бар. Оларға кішкентай кезінен Абайдың өлеңдерін жаттатып, рухани азық бергім келеді. Абаймен сусындап өскен бала – елін, жерін сүйетін, тарихын құрметтейтін азамат болады деп сенемін», — дейді қала тұрғыны Арайлым Жұмағазықызы.
Бұл мерекелік дата Жетісу жұртшылығы үшін кітап пен руханияттың маңызын тағы бір мәрте айқындай түспек.
Редакциядан: материал 24.kz сайтының ақпараты бойынша әзірленді.
