Жетісу облысының орталығында Ұлы жеңістің 80 жылдығына орай оқушылар арасында қазақ күресінен «Мектеп барысы – 2025» жобасының ақтық кезеңі өтті.
Дүбірлі додаға Талдықорғандағы білім шаңырақтарынан алдын ала іріктелген 26 үздік балуан қатысып, «Мектеп Барысы» атағының жеңімпазы анықталды. Жиналған қауым алдында сөз алған Талдықорған қаласының әкімі Ернат Бәзіл жас спортшыларға сәттілік тілеп, қазақ күресінің одан әрі дамуы үшін мұндай тың жобаларды әрқашан қолдауға дайын екенін жеткізді.
– Бүгінгі дода жас палуандарымыз белдесетін, нағыз азаматтардың бақ сынасатын алаңы. Сондай-ақ, ұлттық спортымызды дәріптейтін, ер-азаматтарымыздың рухын көтеретін салауатты өмір салтын насихаттау мақсатында ұйымдастырылған бірегей жоба. Жастар арасында спорт пен спорттық шеберлікті дамытуда мұндай шаралардың маңызы зор. Осындай жарыс ұлтымыздың рухын асқақтатып, жас спортшыларымыздың қазақ күресінен шеберліктері мен дарынын көрсетуге мүмкіндік беретіндігіне сенімім мол,– деді шаһар басшысы.
Көп өтпей тартымды да тартысты өтіп, көрермен қауымның делебесін қоздырған сайыста жүзден жүйрік, мыңнан тұлпар шыққандар анықталды. Жарыс қорытындысы бойынша ақтық кезеңде топ жарып, қарсыластарын айқын басымдылықпен жеңген Талдықорған қалалық №26 орта мектептің 10-сынып оқушысы Қошман Асылбек «Мектеп Барысы» атанды. Ал жүлделі ІІ орынға шаһардағы №4 орта мектептің оқушысы Муслим Саятұлы лайық деп танылса, үздік үшінші жүлдені № 14 орта мектептің оқушысы Мырзабек Ерасыл иеленді.
Еске сала кетсек, осымен екінші рет ұйымдастырылып отырған бұл «Мектеп барысы» жобасы өткен жылы аймақта алғаш «Болашақ» құрылыс компаниясы мен «Savor», «Issmile» және «Мillennium» мейрамханаларының жан-жақты демеушілігінде өткен еді. Ондағы жарысқа қала мектептерінде оқитын оқушылар арасынан алдын ала іріктелген 27 балуан қатысып, аймақтағы №12 орта мектептің оқушысы Бақытбек Исажан тұңғыш «Мектеп барысы» атанған болатын.
Айдын КӘЛІМХАН
