Ақпан айының 6-шы жұлдызы – Дүниежүзілік сайлау күні. Осыған байланысты Талдықорған қаласының әкімі Ернат Бәзіл аймақтағы сайлау саласының ардагерлері және қалалық сайлау комиссиясының мүшелерімен кездесті.
Басқосуға комиссия мүшелерімен қатар Жетісу облыстық аумақтық сайлау комиссиясы төрағасының орынбасары Ержан Сәбитов, сала ардагері Шырақбай Жылқайдаров, Талдықорған қалалық аумақтық сайлау комиссиясын ұзақ уақыт басқарған Ерғазы Қошанбеков және бұрын қалалық мәслихатының аппарат басшысы, шақырылым депутаты болған Тимур Биғожанов қатысты.
Қазақстан Республикасы сайлау және сайлану құқығы Конституциялық заңда реттелгенін атап айтқан шаһар басшысы комиссия қызметі аса жауапкершілікті қажет ететінін атап айтты. Сондай-ақ, Ернат Дүйсенбекұлы ардагерлерді мерейлі мерекемен құттықтап, ізгі тілегін білдірді.
– Бүгін біз сайлау саласында қызмет еткен Талдықорған қаласы ардагерлерінің қоғамға сіңірген ерен еңбегіне айрықша алғыс білдіру мақсатында жиналып отырмыз. Сіздер тәуелсіз Қазақстанның қалыптасуы мен дамуында үлкен үлес қосқан азаматтар ретінде әрқашан құрметке лайықсыздар. Өздеріңізге мәлім, сайлау – демократияның, еркіндіктің және азаматтық жауапкершіліктің символы. Осы арқылы әр азамат өз дауысының маңыздылығын сезініп, елдің ертеңі үшін таңдау жасайды, – деді қала әкімі.
Жиын соңында аймақтың әлеуметтік-экономикалық дамуына және сайлау саласына сіңірген көп жылғы еңбегі үшін бірқатар азаматтар марапатталды.
Айта кетейік, жыл сайын барлық елде ақпан айының бірінші бейсенбісінде 2005 жылы Будапешт қаласында (Венгрия) өткен сайлауды ұйымдастырушылардың жалпы конференциясында сайлау органдарының кәсіби мерекесі ретінде құрылған және Біріккен Ұлттар Ұйымы қолдаған Дүниежүзілік сайлау күні атап өтіледі.
Айдын КӘЛІМХАН
