Талдықорған қаласының әкімі Ернат Бәзіл аймақтағы құрылыс саласына жауапты мердігер мекемелердің өкілдерін қабылдап, алдағы уақытта Жетісу облысының орталығында бой көтеретін шағын аудандардың жобаларына байланысты дайындық жұмыстарын пысықтады.
Басқосуда құрылыс жобасын жасаған «Бақытжан» компаниясы қала әкіміне заманауи үлгіде ірге тасы қаланатын Қаратал өзенінің оң жағалауындағы және шаһардағы 11,12,13-ші шағын аудандарында салынатын құрылыс нысандарының сызбаларымен таныстырды.
Жауаптылардың сөзінше, 210 гектарға жуық аталған аумақта 80 көпқабатты тұрғын үй, 2 мектеп, 2 балабақша және 150 орынды оңалту орталығы мен 200 орынға арналған бір онкологиялық орталық салынады. Бұл ауқымды жоба биылғы жылы басталады деп жоспарлануда. Жаңадан бой көтеретін аудандарда заман талабына сай жабдықталған балалар ойын алаңы, шағын демалыс орындары да қарастырылған.
– Қазір аталған аумақтарға ауыз су, жылу, көгілдір отын, кәріз жүйесі мен байланыс желілерін жүргізу үшін жобалау-сметалық құжаттамасы дайындалуда. Құжаттық жұмыстары бітісімен құрылыс қолға алынады», –дейді жауаптылар.
Айдын КӘЛІМХАН
