Жетісу облысының орталығында жол белгілерін ретке келтіру жұмыстары басталды. Осы барыста шаһардағы көлік ағымы көп 4 көшенің қиылысына тағы бірнеше бағдаршам орнатылмақ.
Жауаптылардың сөзінше, бұл жұмыстарды ертерек қолға алудағы мақсат – аймақтағы көлік қозғалысын және жаяу жүргіншілердің қауіпсіздігін қамтамасыз ету. Ал қала бойынша жол жолақтарын сызу сәуір айының соңына қарай басталады.
Талдықорған қалалық жолаушылар көлігі және автомобиль жолдары бөлімінің мәліметінше, биылғы жылы жол қауіпсіздігін қамтамасыз ету мақсатында қала аумағына 200-ден астам жол белгілері жаңадан қойылса,178 белгі қайта қалпына келтірілмек. Сондай-ақ қалалық полиция басқармасының нұсқамасымен аймақ тұрғындарының сұранысы бойынша көлік көп жүретін 4 көше қиылысына бағдаршам орнату жоспарланған.
Еске сала кетсек, өткен жылы облыс орталығында тағы 4 бағдаршам орнатылып, 200 жол белгісі жаңартылған болатын.
Айдын КӘЛІМХАН
