Биыл Жетісу облысының орталығында 70-ке жуық жол ретке келтіріліп, 17450 шаршы метр көшеге ағымды жөндеу жүргізілмек. Осыған сай қазір шаһарда жол жөндеу жұмыстары қарқын алған.
Талдықорған қалалық жолаушылар көлігі және автомобиль жолдары бөлімінің мәліметінше, биылғы жылы облыс орталығындағы жолдарға ағымды жөндеу жұмыстары өткен жылмен салыстырғанда ерте басталған. Сондай-ақ, былтырғы жылы шаһар бойынша 54 шақырымға жуық жолға жөндеу жұмыстары жүргізілсе, онда негізінен Жастар-1, Солтүстік-Батыс және 8-ші, 9-шы шағын аудандардың көше жолдары тегіс қамтылған. Ал жөнделген бұл жолдардың 29 шақырымға жуығы жаңадан салынатын жол болса, 14,6 шақырымы күрделі жөндеуден өткізілуге тиісті жолдар. Биылғы жылы облыс орталығындағы 70 шақырым жол ретке келтіріледі. Мұнда шаһардағы Құлагер, Бірлік шағын ауданына, Жастар-1 және Солтүстік-Батыс тұрғын үй алабына 54 шақырымға жуық жаңа жол салынаса, аймақтағы жаңадан бой түзеп келе жатқан аудандарда 107 көшеде жол құрылысы басталмақ. Сонымен бірге, 21 шақырымнан астам жол күрделі жөндеуден өткізіліліп, жол жамылғысын ауыстыру бойынша орташа жөндеуге тиіс 27,9 шақырым ұзындықтағы 28 көше жоспарланса, 17400 шаршы метрден астам жолға ағымды жөндеу ісі қолға алынуда. Сонымен бірге жол белгілері мен жол таңбаларын сызу жұмыстары да жалғасуда.
– Биылғы жылғы жол жөндеу жұмыстары өткен жылмен салыстырғанда ертерек басталды. Наурыз айы бастала салысымен ауа температурасының салқындығына байланысты қала тұрғындарының өтініштеріне сай, көшелердегі жол төсемін қалпына келтіру, шұңқырларды тегістеу сынды жұмыстар атқарылған болатын. Сондай-ақ, биыл жаңа жол салу, күрделі жөндеу және ағымды жөндеу жұмыстарының көлемі былтырғыдан екі есе көп. Жол саласы бойынша қолға алынған жобалар 2027 жылы аяқталады деп жоспарланған. Сондықтан жол жөндеу жұмыстарында бастысы әр істің сапалы болуына баса мән беріледі»,– дейді қалалық жолаушылар көлігі және автомобиль жолдары бөлімінің басшысы Ерлан Ниетбаев.
Еске сала кетсек, қала әкімі келтірген тағы бір дерек бойынша, өткен жылы қаланың «Шығыс», «Оңтүстік-Шығыс», «Көктал» шағын аудандары және 3-бөлімше тұрғын аудандарындағы 89 көшеге күрделі жөндеу жұмыстары қолға алынып, оның 14 көшесі толық жасалған. Сонымен қатар қаладағы 10 көшеге орташа жөндеу жұмыстары жүргізіліп, Талдықорғанға қарасты Өтенай ауылындағы 7 көше күрделі жөндеуден өткізіліп, жол қауіпсіздігін қамтамасыз ету мақсатында 17 мыңнан астам шаршы метр жолға ағымдағы жөндеу жұмыстары жүргізілген. Бұған қоса алдағы уақытта жалпы құны 3,5 млрд. теңге болатын «Жастар-2» шағын ауданының жолына күрделі жөндеу жұмыстары басталмақ. Оған жергілікті бюджеттен әзірге 500 млн. теңге қаржы қарастырылған.
Айдын КӘЛІМХАН
