Талдықорған қаласындағы Назарбаев Зияткерлік мектебінің 12-сынып оқушысы Сезім Ертанатов Гарвард университетінен шақырту алды. Бұл туралы «Жетісу» газеті мәлімдеді.
Жоғары оқу жетістіктері, көшбасшылық қасиеттер Сезімге өз жоспарын жүзеге асыруға мүмкіндік берді. Өйткені, АҚШ-тағы ең танымал университеттердің біріне түсу — бұл кездейсоқтық емес, қажырлы еңбектің нәтижесі. Гарвард — жоғары білім беру стандарттарымен танымал американдық, элиталық университеттердің бірі.
Сезим Гарвардтың компьютерлік ғылымдар бөлімінде бакалавриатқа түсуді жоспарлап отыр.
— Мені әрқашан ақпараттық технологиялар теориялық және математикалық тұрғыдан қалай жұмыс жасайтыны қызықтырады. Қазіргі уақытта мен Java, C++, PHP сияқты бағдарламалау тілін үйрендім. Мен сондай-ақ түрлі веб-сайттарды жасағанды, деректі фильмдер түсіргенді және редакциялағанды ұнатамын, — дейді болашақ студент.
Математика пәнінің мұғалімі Зухра Нурлыханқызының айтуынша, Сезімнің болашақта табысты маман болуға барлық мүмкіндігі бар. Ол өз бетінше оқуға қабілетті, белгілі бір мәселелер мен сұрақтарды шешудің әртүрлі нұсқаларын ұсына алады. Айқын мақсат қоя білу, саналылық — оның ең мықты қасиеттері. Оның тапқырлығы тек математика сабағында ғана емес, жалпы мектептің өзін-өзі басқару, көшбасшылық саласында да көрінді.
Мектеп қабырғасында Сезім бірқатар еріктілер қозғалысын ұйымдастырды, кәсіптік бағдарлау комитетін ашты және БҰҰ моделі ойыны бойынша қалалық конференция өткізді. Сонымен бірге, ол информатика және қазақ тілі пәндерінен «Жас ғалым», «Дарабоз» атты халықаралық, республикалық олимпиадалардың жүлдегері және жеңімпазы атанды.
— Сезім, менің ойымша, республиканың көптеген мектеп оқушылары үшін өзінің табандылығы мен нақты жоспарлау қабілетінің арқасында әлемдегі ең үздік университетке түсе алған адамның үлгісі болды. Талдықорған қаласындағы Назарбаев Зияткерлік мектебінің тарихында Сезім — Гарвардқа шақырылған екінші оқушымыз, — дейді директордың оқу ісі жөніндегі орынбасары Ерали Бижанов.
«ЖЕТІСУ-АҚПАРАТ»
