Қаңтар айының 12-ші жұлдызы аса көрнекті мемлекет және қоғам қайраткері Дінмұхамед Ахметұлы Қонаевтың туған күні. Осыған байланысты Жетісу облысының орталығы Талдықорғанда тау тұлғаны еске алуға арналған арнайы іс- шара өтті.
Қала тұрғындары мен басшылары, ардагерлер және жастар қатысқан еске алу шарасында марқұмның рухына тағзым етіліп, еңселі ескерткіші алдына гүл шоқтары қойылды. Жиналған қауым алдында сөз алған Талдықорған қаласының әкімі Ернат Бәзіл халқымыздың қадірлі перзенті Дінмұхамед Ахметұлы билік тізгінін ұстаған тұста 40-тан астам қала тұрғызып, ел экономикасының дамуы мен ұлт мүддесін қорғау жолында қосқан өлшеусіз үлесін екенін айрықша атап өтті.
– Қазақ халқының біртуар азаматын еске алғанда, тау тұлғаның еліміздің өркендеуіне үлес қосқаны, мәдениеттілігі, адалдығы мен адамдығын ескерер болсақ, одан асқан қарапайым басшы болмағанын ұғынамыз. Ұлт тарихын зерделеуде артында қалған мұрасы мен келелі ой-тұжырымдарын зерттеп жеткізу, ұлт перзенттерін ұлықтау – біз үшін абыройлы парыз. Дана халқымыздың дара перзенті Дінмұхамед Ахметұлы ел үшін туған ер еді. Аянбай қызмет етіп, адалдық пен шындықты ту еткен, қазақтың еңсесінің көтерілуіне елеулі еңбек сіңірген жанның бейнесі қаншама жылдар өтсе де әр қазақтың жүрегінде мәңгі сақталмақ,– деді шаһар басшысы.
Шара барысында Жетісу облысындағы Қонаев қоғамдық қорының өкілі Бақберген Түкібаев мемлекет қайраткерінің өмірі мен өскен ортасы, еңбек жолы туралы қысқаша тоқталды. Сонай-ақ, ол: — «Әр қадамы ізгілікке толы Дінмұхамед Ахметұлы ел экономикасы мен ұлт мәдениетінің өркендеуіне өзінің білімі мен мол тәжірибесін арнаған заңғар саясаткер. Ол түрлі деңгейдегі қызметтерді атқара жүріп, өктем саясаттың ығына жығылмай, ұлт қамын бір сәтке де естен шығармаған жан. 1912 жылы әсем қала Алматыда дүниеге келіп, мағыналы да мәнді ғұмыр кешкен Дінмұхамед Ахметұлы әрдайым халқымыздың жүрегінде. Бар ғұмырын ұлт қамы, ұрпақ болашағына арнаған бір туар тұлға 1993 жылы 22 тамыз Алакөл аумағында өмірден озды. Көзінің тірісінде мансап пен байлықтың құлы болмай, көпке үлгі бола білді. Оның даңқты есімі ел жадынан мәңгі өшпек емес», -деп сөзін түйіндеді.
Айдын КӘЛІМХАН
