Талдықорған қаласында тұрғындарды баспанамен қамту бағытындағы жұмыстар жүйелі түрде жалғасып келеді. Жаңа жыл қарсаңында шаһарда 60 пәтерлі жаңа тұрғын үй пайдалануға беріліп, көптен күткен қоныс тойы өтті.
Салтанатты шараға Талдықорған қаласының әкімі Ернат Бәзіл қатысып, жаңа пәтер иелерін қуанышымен құттықтады. Қала басшысы өз сөзінде тұрғын үй құрылысы халықтың өмір сапасын арттырудағы басты басымдықтардың бірі екенін атап өтті.
– Мемлекет тарапынан тұрғындарды қолжетімді баспанамен қамту бағытында нақты жұмыстар атқарылып келеді. Бүгін пайдалануға берілген бұл тұрғын үй соның айқын дәлелі. Жаңа қоныс иелеріне құтты болсын айтып, әр шаңыраққа береке мен амандық тілеймін, – деді Ернат Дүйсенбекұлы.
Жаңа тұрғын үй заманауи талаптарға сай салынып, барлық инженерлік инфрақұрылыммен толық қамтылған. Пәтерлер әлеуметтік осал топтағы азаматтарға, көпбалалы отбасыларға және тұрғын үй кезегінде тұрған қала тұрғындарына табысталды.
Қоныс иелері мемлекет қолдауының арқасында баспаналы болып отырғандарын айтып, ризашылықтарын білдірді. Олардың айтуынша, жаңа үйлер жайлы, жылы әрі өмір сүруге қолайлы.
Ынтымақ шағын ауданындағы №30 орта-мектептің мұғалімі Айнұр Дәулетхан үшін биылғы жыл ерекше қуанышпен есте қалды. Ұстаз көптен күткен арманы орындалып, баспаналы болғанын жеткізді.
– Ұстаз үшін тұрақты баспана – тек жайлылық емес, ертеңгі күнге деген сенім. Мемлекет тарапынан көрсетіліп жатқан қолдаудың арқасында осындай қуанышты күнге жетіп отырмын, – дейді ол.
Айнұр Дәулетханның айтуынша, жаңа тұрғын үй барлық талапқа сай, кең әрі өмір сүруге қолайлы. Бұл қуаныш тек ұстаздың ғана емес, бүкіл отбасының мерейін үстем етті.
Айта кетейік, өңірде білім беру саласы қызметкерлерін қолдау, оларды тұрғын үймен қамту бағытындағы жұмыстар жүйелі түрде жалғасып келеді. Бұл бастамалар әлеуметтік сала мамандарының мәртебесін арттырып, еңбекке деген ынтасын күшейтуге ықпал етуде.
«Айналайын» балалар үйінің тәрбиеленушісі Санат Шерубаев бүгінде №16 орта-мектептің 10-сыныбында білім алады. Ол болашағын ақпараттық технологиялар саласымен байланыстырып, ІТ маманы болуды армандайды.
Санат үшін биыл ерекше жаңалықтармен есте қалды. Жасөспірім бір бөлмелі баспанаға қол жеткізіп, дербес өмірге алғашқы қадамын жасады. Ендігі мақсаты – осы шағын үйін заманауи талапқа сай студияға айналдыру.
– ІТ саласы – болашақтың кілті. Өз студиям болса, бағдарламалау үйреніп, түрлі жобамен айналысқым келеді, – дейді ол.
Оның талпынысы балалар үйінде тәрбиеленген жастардың да үлкен арманға ұмтылып, өз болашағын қалыптастыруға қабілетті екенін көрсетеді. Қолдау мен сенім болған жағдайда, мұндай мақсаттардың орындалары сөзсіз.
Алдағы уақытта да Талдықорған қаласы мен облыс аудандарында тұрғын үй құрылысы жалғасып, жаңа пәтерлер пайдалануға берілмек. Бұл жұмыстар халықтың әлеуметтік жағдайын жақсартуға және өңірдің тұрақты дамуына серпін береді.
Қажет Андас
