Талдықорғада білім саласын жаңа деңгейге көтеретін «Al-Farabi STEM Academy» жекеменшік бастауыш мектебінің салтанатты ашылу рәсімі өтті. Жаңа білім ордасының лентасын қиған қала әкімі Ернат Бәзіл өз сөзінде жекеменшік мектептердің көбеюі бәсекелестікті қалыптастырып, білім сапасын арттыруға және ата-аналар мен оқушылар үшін таңдау мүмкіндігін көбейтетіндігін атап өтті, – деп хабарлайды 7-su.kz ақпараттық порталы.
Заманауи талаптарға сай жабдықталған бұл мектеп 1-4 сынып оқушыларына арналған және оқыту процесі қазақ, орыс тілдерінде жүргізіледі. Оқу бағдарламасы негізінен математика мен логикалық ойлауды дамытуға бағытталған, сонымен қатар балалардың жан-жақты дамуы үшін робототехника, ағылшын тілі, шахмат және каратэ үйірмелері қарастырылған.
Мектеп директоры Мадина Маметованың айтуынша, білім ордасының негізгі ұстанымы – сапалы білім берумен қатар, ұлттық әрі адамгершілік құндылықтарды бойына сіңірген, жауапкершілігі жоғары тұлға тәрбиелеу. Осы мақсатта мектепте жас мамандарды қолдау мен тәжірибелі ұстаздардың әлеуетін тиімді пайдалану шаралары қолға алынып, нәтижесінде 30-ға жуық жаңа жұмыс орны ашылды.
