Жетісу облысының орталығында 185 орынға арналған жаңа әлеуметтік-әмбебап базар ашылды. Жобаның жүзеге асуына Талдықорған қаласының әкімдігі мен «Жетісу» ӘКК бірлесіп қолдау көрсеткен.
Мамандардың мәліметінше, заман талабына сай салынған бұл әмбебап базар шаһардағы Гаухар Ана және Абай көшелерінің қиылысында орналасқан. Ондағы жабық павильоннан өнеркәсіп тауарлары мен азық-түлік өнімдерін сатуға арналған 54 сауда нүктесі бар. Бұдан бөлек, павильон аумағында 75 бутик ашылып, ол жерде қоғамдық тамақтану орындары, тұрмыстық қызмет көрсету орталықтары мен сұлулық салондары жұмыс жасамақ. Енді өңірдегі Ескелді, Қаратал, Көксу аудандарынан және Текелі қаласынан келетін тамақ өнімдерін тасымалдайтын жүк көліктері осы базарға келіп тұрақтайтын болады.
Жауаптылардың сөзінше, жаңадан салынған базар тұрғындарға қолайлы болуы үшін ол жерге қаладағы №27 бағыттағы қоғамдық көлік қатынайды. Сонымен бірге, аталған базар аумағынан қала орталығындағы рұқсатсыз сауда нүктелерін жою мақсатында арнайы 56 орын бөлінген. Бұл ұзақ жылдар бойы шаһардағы шешімін таппай келген жабайы сауда мәселесін реттеуге бағытталған.
Қала тұрғындарының айтуынша, Талдықорған қаласына облыс орталығы мәртебесі берілгеннен бері еш жөндеу көрмеген орталық базар аумағы ұзақ жылдар бойы жабайы сауда алаңына айналып келген. Тіпті, ондағы жолдың екі жағасына тізілген түрлі жеміс-жидектер мен басқа да тауарлардан аяқ алып жүргісіз болатын. Саудагерлер жаяу жүргіншілер жүретін жолды да иеленіп алған. Оның үстіне, жол шетіне иін тірестіре қойылған сатушылардың және такси жүргізушілерінің көліктерінен жұрттың базарға кіріп-шығуы мұң болатын. Биыл бұл келеңсіздіктерді жою үшін базар аумағы тегіс абаттандырылып, ретке келтірілді. Енді аталған аумақта еш жөндеу көрмеген Дайыров көшесі ғана қалыс қалып келеді. Ал жаңадан ашылған әлеуметтік бұл базар кең әрі жарық, сауда сатушылар үшін де, сауда алушылар үшін де өте қолайлы жабдықталған.
Айдын КӘЛІМХАН
