Бүгінде Жетісу облысының орталығында тозығы жеткен аялдамалар жаңартылып, жаңадан бой көтерген тұрғын үй алаптарындағы жұрттың сұранысына сай жаңа аялдамалар орнатылуда.
Сала мамандарының мәліметінше, қазіргі таңда Талдықорған қаласы бойынша 280-нен астам аялдама бар, оның 21-і — смарт аялдамалар. Сонымен бірге, жаңадан бой көтеріп жатқан шағын аудандар мен тұрғындардың сұранысы жоғары аумақтарға қазақы нақышта безендірілген 36 жаңа аялдама орнату жұмыстары қолға алынған. Бұл бастама негізінен өңір тұрғындарының жайлылығы мен қауіпсіздігін қамтамасыз етуге бағытталған.
Еске сала кетсек, облыс орталығындағы смарт аялдамалар 2018 жылы ел игілігіне берілгенімен, сапасы сын көтермей, өңір тұрғындарының наразылығын тудырып келген. Өткен жылы қала әкімінің тапсырмасымен бұл аялдамаларды заман талабына сай жабдықтап, 5 жылға сенімгерлік басқаруға беру шешімі бойынша қайта жөндеуден өткізу жұмыстары басталған болатын. Нысандарды жаңарту ісі биылғы жылы толық аяқталмақ. Сонымен бірге, қаладағы ескі аялдамалар толықтай жаңартылып, шаһардағы шағын аудандарға жаңасын қою жұмыстары жалғасуда.
– Жаңа аялдамалар заманауи талаптарға сай жасалған және ұлттық өрнектермен безендірілген. Бұл тек тұрғындардың жайлылығын арттырып қана қоймай, қаланың кескін-келбетін жақсартуға мол мүмкіндік береді. Сонымен қатар, смарт аялдамаларды қалпына келтіру жұмыстарын жыл соңына дейін аяқтайтын боламыз, – дейді Талдықорған қаласы жолаушылар көлігі және автомобиль жолдары бөлімінің басшысы Ерлан Ниетбаев.
Айдын КӘЛІМХАН
