Талдықорған көпсалалы ауруханасында күрделі қан тамырлары отасы сәтті жүргізіліп, дәрігерлер пациенттің жалғыз аяғын аман алып қалды.
Жетісу өңірінің медицина мамандары кезекті рет жоғары кәсібилік танытты. Ауруханаға түскен азамат бұған дейін денсаулық жағдайына байланысты бір аяғынан айырылған еді. Осы жолы екінші аяғындағы қан айналымы нашарлап, мүгедектік қаупі қайта төнді. Осындай аса жауапты сәтте қан тамырлары хирургі Дархан Искаков бастаған дәрігерлер тобы дереу іске кірісті.
Дәрігерлер нақасқа баллонды ангиопластика жасады. Бұл әдіс – ағзаға үлкен ота жасамай-ақ, зақымданған қан тамырларының саңылауын кеңейтіп, қан айналымын қалпына келтіретін заманауи тәсіл. Жоғары технологиялық медициналық көмек операциондық үстелде сәтті аяқталып, науқастың аяғын ампутациялаудан аман алып калуға толық мүмкіндік берді.
Маңызды айта кетерлік жайт, мұндай қымбат әрі күрделі ота Міндетті әлеуметтік медициналық сақтандыру (МӘМС) жүйесі аясында жүзеге асырылды. Пациент үшін барлық емдеу шаралары 100% тегін көрсетілді. Бұл мысал еліміздегі МӘМС жүйесінің тиімділігін, әсіресе ауыр жағдайдағы азаматтарға жоғары денсаулық сақтау қызметтерінің қолжетімді екенін айқын дәлелдейді.
Ауруханадан шыққан азамат енді өздігінен қозғалып, ешкімге сүйенбей күнделікті тіршілігін жалғастыра алады. Денсаулық сақтау саласындағы осындай оң өзгерістер мен сәтті кейстер өңірдегі медицина сапасының артып келе жатқанын көрсетеді.
Жетісу облысы бойынша КеАҚ
«Әлеуметтік медициналық сақтандыру қоры»
