Жетісу облысының орталығында белгілі бапкер Тұратбек Чарапиевтің 70 жылдық мерейтойына арналған дзюдодан жас жеткіншектер арасында облыстық ашық турнир өтті.
Спорттық шараның ашылу салтанатында сөз алған облыстағы спорт ардагерлері Тұратбек Чарапиевтің өңір спортын дамытуға қосқан үлесінің зор екенін айрықша атап өтіп, жарысқа қатысушы жас спортшыларға сәттілік тіледі.
– Жетісу облыстық қазақ спорт қауымдастығы үшін Тұратбек Төлеубекұлының орны ерекше. Себебі ардақты ұстаз, даңқты бапкердің өңірдегі спорт саласына сіңірген еңбегі зор. Сондықтан да бұл турнир жас спортшылар үшін тәжірибе мектебі ғана емес, спорт ардагеріне көрсетілген үлкен құрмет, – деді қауымдастық басшысы.
Аталған дүбірлі додаға облыстың түкпір-түкпірінен келген 250-ге жуық жас балуан қатысып, өз шеберліктерін көрсетті. Сонымен, Тәуелсіздік күні қарсаңында тартымды да тартысты өткен белдесулерде жас спортшылар өз дайындығы мен шеберліктерін паш етті.
Көпшіліктің көз алдында өткен сайыстың командалық есеп қорытындысы бойынша қарсыластарының бәрінен басым түскен Талдықорған қаласы І орынға ие болса, ІІ орынды Текелі қаласы жеңіп алды. Ал үздік ІІІ орынға Талғар ауданы лайық деп танылды. Жарыс жеңімпаздары медаль және арнайы сыйлықтармен марапатталды.
Айдын КӘЛІМХАН
