Жетісу облысының орталығында Іскер әйелдер қауымдастығының І аймақтық форумы өтті. Шаһардағы «Атамекен» көрме кешенінде өткен басқосуға өңірдегі әр саланың жауаптылары, кәсіпкерлер және басқа да компаниялардың өкілдері қатысты.
Іскер әйелдер қауымдастығының 30 жылдығына орай ұйымдастырылған «ZHETISU WOMEN FORUM 2025» іс-шарасы кәсіпкерлікті дамытуға, тәжірибе алмасуға, ашық диалог жүргізуге және іскерлік байланыстарды кеңейтуге бағытталған.
Басқосуда қатысушылар өз ісін дамыту, облыс пен қаланың экономикалық және әлеуметтік мәртебесін арттыру туралы өзекті мәселелерді кеңінен талқылады.
Жиналған қауым алдында сөз алған Талдықорған қаласының әкімі Ернат Бәзіл жергілікті биліктің кәсіпкерлікті, әсіресе шаһардағы шағын және орта бизнес саласын қолдауға әрдайым дайын екенін жеткізді. Сондай-ақ ол сауда салығының мөлшерлемесін 4 пайыздан 2 пайызға төмендету тәжірибесінің Талдықорғанда алғаш рет жүзеге асырылғанын тілге тиек ете отырып, бұл аймақтағы билік пен бизнес қауымдастығы арасындағы ашықтық пен өзара ынтымақтастықтың айқын үлгісі екенін айрықша атап өтті.
Жетісу облысының Іскер әйелдер қауымдастығының төрайымы Анель Капекованың айтуынша, елімізде бұл қауымдастық 1995 жылы Раушан Сәрсенбаеваның бастамасымен құрылған. Бүгінде елдің 21 облысында жұмыс істейтін бұл ұйым бизнес, саясат және әлеуметтік кәсіпкерлік саласында 15 мыңнан астам қыз-келіншектерді біріктірген. Ал Жетісу облысындағы әйелдер қауымдастығы 2025 жылдың сәуір айында құрылған. Қазіргі таңда 40 белсенді кәсіпкерді біріктіріп, өнімді жұмыс істеп келеді.
– Осы уақыт ішінде атқарылған істер де аз емес. Аймақта «Климат күтпейді» экологиялық бастамасы қолға алынып, «Мейірім керуені», ерекше қажеттіліктері бар балаларға арналған халықаралық «Басқа өмір» қоры және қайырымдылық жаңа жылдық «Бақ береке» балы сынды маңызды жобалар жүзеге асырылды, – дейді қауымдастық төрайымы.
Форум барысында қатысушылар өздерінің орамды ой-пікірлерін айтып, іс-тәжірибелерімен бөлісті.
Айдын КӘЛІМХАН
