Кездесу барысында түркиялық компания өкілдері облыс орталығынан заманауи қоқыс өңдеу зауытын салумен қатар, қалдықтарды қайта өңдеуге арналған қондырғыларды орнатуға ниетті екенін жеткізді.
Жоба авторларының айтуынша, зауыт еуропалық стандарттарға сай жобаланған. Ол атмосфераға көмірқышқыл газының таралуына зиян келтірмейді. Сонымен қатар, өңделген қоқыс қалдықтарының бір бөлігі құрылыс және жол салу жұмыстарында қайта қолдануға жарамды.
Сөз кезегінде Ернат Дүйсенбекұлы жобаның тиімділігіне тоқталып, оны жүзеге асыру арқылы өңірдің экологиялық мәселелерін шешуге болатынын атап өтті:
– Мұндай тың жоба аймағымыз үшін аса қажет. Бүгінде қала аумағынан әр күн сайын 100 тоннаға жуық тұрмыстық қатты қалдық шығарылады. Өкінішке қарай, оның басым бөлігі қайта өңделмей, қоқыс полигонында жиналып жатыр. Ал түркиялық компанияның ұсынып отырған жобасымен танысып, оның қалай жұмыс істейтініне көз жеткіздік. Ендігі міндет – осы жобаны нақты жүзеге асырып, жылдар бойы полигонда жиналып қалған қоқысты тиімді өңдеу. Осы арқылы біз қала аумағынан шығатын қалдықтарды қайта өңдеп, экологиялық жағдайды жақсарта аламыз, – деді шаһар басшысы.
Қала әкімдігінің мәліметінше, аталған жоба аясында тәулігіне 500 тоннаға дейін қоқыс өңдеуге қауқарлы зауыт іске қосылмақ. Бұл кәсіпорын тек қоқысты өртеп қана қоймай, одан электр энергиясы мен жылу өндіруді де көздейді. Зауыт іске қосылған жағдайда ол тек Талдықорған қаласын ғана емес, аймақтағы Көксу, Ескелді, Қаратал аудандары мен Текелі қаласының қалдықтарын да өңдейтін болады.
Айдын КӘЛІМХАН
