Жетісу облысының орталығындағы Шығыс өнерәсіп аймағында өрт болды. Қызыл жалын пластик қалдықтарын қайта өңдеу цехның ашық алаңында тұтанған.
Оқиғадан хабар тапқан облыстық төтенше жағдайлар департаментінің өрт сөндірушілері дер кезінде іске кірісіп, тілсіз жауды ауыздықтады. Сала мамандарының мәліметінше, өртке 21 техника, 63 қызметкер жұмылдырылған. Отқа оранған материалдарының жоғары жанғыштығы мен ұйытқи соққан желдің екпіні өртті ауыздықтауға көп кедергі келтірген. Алайда қызметшілердің жедел әрі үйлесімді іс-қимылдарының арқасында 1500 шаршы метр алаңды шарпыған қызыл жалын көп өтпей бақылауға алынып, толық сөндірілген.
– Өрт болғаны туралы хабарлама түскеннен кейін жедел штаб құрылып, сала қызметкерлері оқиға орнына жетті. Атап айтқанда, жергілікті атқарушы органдарынан 3 су тасымалдаушы көлік пен 3 жауынгерлік учаске жұмыс жасады. Осы орайда медициналық орталықтың мамандары да өз қызметтерін атқаруға сақадай сай тұрды,– дейді облыстық ТЖД бастығының у.м.а. Адамбек Оразалинов.
Айта кетсек, өрттен зардап шеккендер тіркелмеді әрі өрт салдарынан басқа нысандарға қауіп төнген жоқ.
Айдын КӘЛІМХАН
