Жаңа жыл түні Жетісу облысының орталығындағы перзентханада төрт нәресте дүниеге келді.
Талдықорған қаласы әкімінің баспасөз қызметі таратқан мәлімет бойынша, шаһарда 31 желтоқсан күні кешке бір қыз бала туса, 1 қаңтардың таңы атқанға дейін тағы үш сәби дүние есігін ашқан. Ал, 2026 жылдың алғашқы сәбиі түн ортасынан 20 минут өткенде туған қыз бала. Жалпы жаңа жыл түнінде облыс орталығында екі қыз, екі ұл бала өмірге келген.
– Бұл күні сәбилі болғандардың бірі 2001 жылы туған жас ана Зарина Тайгельдинова есімді азаматша. Ол салмағы 4600 грамм, бойы 57 см болатын қызын өмірге әкелді. Әрбір босану бір мезетте әрі жауапкершілік, әрі қуаныш. Ал Жаңа жылдағы босанулар әрдайым ерекше сезімге толы. Өйткені жаңа жылмен бірге жаңа тағдыр да басталады, – дейді жауаптылар.
Денсаулық сақтау министрлігі таратқан ақпаратқа жүгінсек, жаңа жыл түні жалпы ел аумағындағы перзентханаларда 254 сәби дүниеге келген. Салыстырмалы түрде айтақ, сол түні 29 сәби өмір есігін ашқан Түркістан облысы көш басына жайғасса, екінші орында Шымкент, одан кейінгі орындарда Астана және Алматы қалалары тұр.
Айдын КӘЛІМХАН
