Талдықорған қаласы әкімдігінде өткен салтанатты шарада сөз алған шаһар басшысы Ернат Бәзіл жастарға мемлекеттік қызмет – маңызды міндет екенін айрықша атап өтіп, олардың алғашқы қадамына сәттілік тілеп, естелік бұйымдар табыстады.
– Мемлекеттік қызметтің жауапкершілігі аса жоғары, ел мен халыққа жұмыс жасаудағы абыройлы жол. Сіздерді ел мүддесін бәрінен биік қойып, қашан да жұртқа адал еңбек етуге шақырамын. Күндеріңіз көңілді, қызметтеріңіз табысты болсын,– деді қала әкімі.
Осыдан соң жас қызметшілер көпке адал қызмет көрсету үшін ант берді. Бұл жолғы ант бергендер арасында Талдықорған қаласының дене шынықтыру және спорт, қалалық ішкі саясат, сондай-ақ, экономика және бюджеттік жоспарлау бөлімдерінің бас мамандығына қабылданған жастар бар.
Еске сала кетейік, бүгінде Жетісу облысындағы 350-ге жуық мекемелердегі мемлекеттік қызметшілердің саны 3500-ден асады. Олардың тең жармына жуығы әйелдер қауымы. Аймақта көрсетілетін мемлекеттік қызметтің 762 түрі бар. Оның 467-сі орталық, 295 түрі жергілікті атқарушы органдар жағынан көрсетіледі. Ал Талдықорған қаласы әкімдігінде 114 мемлекеттік қызметкер жұмыс істесе, олардың 30-ға жуығы жас мамандар.
Айдын КӘЛІМХАН
