Жетісу облысының орталығындағы тұрғындарға табиғи газ жеткізу жұмыстары жүйелі жүргізілуде. Атқарылған істердің нәтижесінде шаһардағы жаңадан бой көтерген «Жастар-3» тұрғын үй алабы толықтай көгілдір отынға қосылды.
Талдықорған қаласының әкімі Ернат Бәзілдің айтуынша, аймақты газдандыру ісі – қала халқының өмір сапасын арттыруға бағытталған маңызды жоба. Атқарылған жұмыстардың арқасында бүгінде Жетісу облысының орталығын газбен қамту деңгейі 90 пайыздан асқан.
– Қаладағы жаңа тұрғын үй алаптарын инфрақұрылыммен қамту – біздің басым бағыттарымыздың бірі. Енді, міне, қалаға қарасты «Жастар-3» жаңа ауданы табиғи газбен толық қамтылды. Табиғи газға қосылған үйлер тұрғындарға жайлы өмір сүруге мол мүмкіндік сыйлайды, – деді шаһар басшысы.
Талдықорған қалалық тұрғын үй қатынастары бөлімінің басшысы Таңат Төлеуғалиұлының сөзінше, бұл – облыс орталығының әлеуметтік инфрақұрылымын дамыту және тұрғындарға қолайлы жағдай жасау бағытында жүзеге асырылып жатқан маңызды жобалардың бірі. Мемлекет басшысының өңірлерде жаңа тұрғын үй алаптарын салу жөніндегі тапсырмасына сәйкес, 2024 жылдың тамыз айында облыс әкімі Бейбіт Исабаевтың қолдауымен аймақта «Жастар-3» жаңа тұрғын үй алабында жеке үйлер салу туралы шешім қабылданған.
Жобаның басты мақсаты – халықтың әлеуметтік осал топтары санатындағы азаматтарды баспанамен қамтамасыз ету. Жоба аясында өткен жылы аталған аумақтан 56 баспана тұрғын үй кезегінде тұрған азаматтарға үлестіріліп, тағы 251 үй сатып алу жоспарланған. Бүгінгі күнге дейін оның 123-і ел игілігіне беріліп, қалған 128 үй жыл соңына дейін табысталмақ.
Мамандардың мәліметінше, «Жастар-3» тұрғын үй алабында табиғи газ тарту жұмыстары мамыр айында басталып, құрылыс-монтаж жұмыстары қыркүйек айында толық аяқталған. Мұнда газ желісімен қатар ауызсу, кәріз жүйесі мен түнгі жарықтандыру да толық жүргізілген. Сонымен бірге жол сапасын жақсарту мақсатында тамыз айында басталған 3,5 шақырым жерге асфальт төсеу жұмыстары аяқталуға жақын. Ал 2026 жылы жалпы ұзындығы 8,5 шақырым болатын көше жолдарына асфальт жабындысы төселмек.
Айдын КӘЛІМХАН
