Алматы қаласында өткен «Қазақ аруы – 2025» ұлттық сұлулық байқауының жеңімпазы анықталды. Биылғы байқауда Талдықорған қаласының намысын қорғаған блогер әрі жас кәсіпкер Дәрия Қуатжан бас жүлдеге ие болды.
Жеңімпаз халықтың дауыс беруі арқылы таңдалды. Нәтижелер жобаның Instagram-дағы ресми парақшасында жарияланды. Финал қорытындысы бойынша Дәрия Қуатжан 26 376 дауыс жинап, басты қарсыласы Диана Қырымды (13 160 дауыс) екі есеге жуық артта қалдырды. Үздік үштікке Дариға Рахым (11 045 дауыс) ілікті.
Дәрия – ұлттық өнерге және дәстүрлі ою-өрнектерге ерекше ықыласпен қарайтын дизайнер. Жоба ұйымдастырушылары оның шығармашылығы қазақ мәдениетінің рухын заманауи стильмен ұштастыра алатын бірегей қабілетін атап өтті.
Байқаудың негізгі мақсаты – дарынды жастарды анықтау мен қолдау, қазақ халқының мәдени мұрасын насихаттау, сондай-ақ отандық және шетелдік жастар арасындағы достық пен өзара түсіністікті нығайту.
Айта кетейік, өткен жылы бұл байқауда Қызылорда облысының тумасы Ақкербез Ысқаққызы жеңіске жеткен болатын. Алайда сол кездегі нәтижеге әлеуметтік желіде наразылық білдіргендер де табылған еді.
Дереккөз: stan.kz
