Жетісу облысында «Таза Қазақстан» жобасы аясында сенбіліктер тұрақты түрде өткізіліп келеді. Көктем басталғалы бері Талдықорған қаласында экологиялық тазалық жұмыстары мен ағаш отырғызу белсенді жүргізілуде.
Бүгін облыс орталығында ағаш отырғызу рәсімі сәтті өтті. Іс-шараға Жетісу облысы әкімінің орынбасары Диас Есдаулетов, қоғамдық даму басқармасының басшысы Бауыржан Әбибеков, сондай-ақ «Ақжол», «Республика» партияларының депутаттары мен үкіметтік емес ұйым өкілдері қатысты. Жастар саябағы маңындағы Ту тұғыр алаңында қылқан жапырақты ағаш көшеттері отырғызылды.
– Бүгін сауапты іске өз үлесімізді қосып жатырмыз. Талдықорған – жасыл желекке оранған көрікті қала. Бұл қаланы одан әрі абаттандыру – баршамыздың ортақ борышымыз. «Таза Қазақстан» жобасы табиғатқа жанашырлық танытып қана қоймай, жас ұрпаққа үлгі көрсетеді, – деді «Республика» партиясының депутаты Гүлназ Мұстафа.
Таза Қазақстан жобасы аясындағы ағаш егу акциялары алдағы уақытта да жалғасын табады.
Фото: Александр СКЛАБОВСКИЙ
