ҚР Парламенті Мәжілісі мен барлық деңгейдегі мәслихаттардың сайлауына өз үміткерлерін ұсынып отырған «Ақ жол» демократиялық партиясы Алматы облысының аудан, қалаларын аралап, сенімді өкілдермен кездесу өткізуде.
Бұған дейін Панфилов ауданының орталығы Жаркент қаласы мен Ұйғыр ауданының орталығы Шонжыдағы сайлауалды штабында бас қосқан партия мүшелері өздерінің сайлауалды бағдарламасында көрсетілген міндеттер мен мақсаттарды саралап, сенімді өкілдерге жауапкершілік жүктеді.
Енді облыс орталығы Талдықорған қаласында Парламент Мәжілісі мен облыстық, аудандық, қалалық мәслихат депутаттығына кандидаттармен кездесіп, «Ақ жол» демократиялық партиясының еліміздің өркендеуі жолында ұсынған тиімді жолдары таныстырылды.
Атап айтқанда, облыстық мәслихаттың депутаттығына үміткер Мейраш Шынасилова, Ермек Егінбаев, Рафхат Файзуллин, Жанболат Рыспеков, Іле аудандық мәслихатының депутаттығына кандидат Дүрия Даниярова, Талғар ауданынан Амангелді Құдайбердиев пен Нұрсұлтан Үсенов, Балқаш ауданынан Қайрат Нұртаев пен Бақытжан Ахметқұлов, Қапшағай қаласынан Рашит Кенжеев «Ақ жол» демократиялық партиясының саяси додадағы басымдығы мен жеңісін айқындайтын қадамдарды қалай жүзеге асыруға болатынын талқылап, Жетісу жерінің аудандары мен қалаларындағы сенімді өкілдердің жергілікті тұрғындармен қалай жұмыс істеуі керектігін пысықтады.
Жиында демократиялық партияның сайлауалды үгіт-насихат жұмыстарын жандандырудың, сайлаушылармен кездесудің маңыздылығы да назарға алынды.
«Ақ жол» демократиялық партиясының баспасөз қызметі
