Жетісу облысының орталығында Талдықорған қаласы әкімінің орынбасары Жеңіс Андабековтің төрағалығымен шаһардағы экстремизм мен терроризмге қарсы жұмыс тобының кезекті отырысы өтті.
Басқосуға облыс орталығындағы мамандандырылған және құқық қорғау саласының, әскери құрылымдардың, сондай-ақ жергілікті өзін-өзі басқару органдарының өкілдері қатысты.
Жауаптылардың сөзінше, бүгінде аймақтағы діни саладағы жұмыстар конфессияаралық қарым-қатынасты нығайту, діни экстремизм мен терроризмнің алдын алу бойынша тұрғындар арасында ақпараттық-түсіндіру жұмыстарын жүргізу, интернет кеңістігінде және әлеуметтік желілерде қарсы насихаттық шараларды ұйымдастыру, әлеуметтік қолдау, психологиялық көмек, оңалту сынды бірнеше бағыт бойынша жүзеге асырылуда.
Осыған сай жиында халықтың қауіпсіздігін қамтамасыз ету, терроризм көріністерінің алдын алу, оның таралуына ықпал ететін факторларды барынша азайту мәселелері жан-жақты талқыланды. Соның ішінде профилактикалық жұмыстың жай-күйіне, жедел ахуалға және инфрақұрылым нысандарын қорғауға бағытталған кешенді шараларды жүзеге асыруға баса назар аударылды. Жиын барысында Жеңіс Саятбекұлы құзырлы орын басшыларына бұл басқосуда көтерілген маңызды мәселелерді қатаң бақылауға алып, жұмыстарды жалғастыруды тапсырды.
Сала мамандарының мәліметінше, қазір Жетісу облысы аумағында 11 конфессияны қамтитын 269 діни бірлестік пен филиал тіркелген. Онда 342 діни қызметкер жұмыс істейді. Оның 265-і – мешіт имамдары, 77-сі – христиандық және өзге де діни бірлестік өкілдері. Ал миссионерлік қызметті жүзеге асыруға рұқсаты бар 13 азамат тіркелген, оның 11-і – шетелдік. Қазір өңірдегі діни ахуал тұрақты.
Айдын КӘЛІМХАН
