Журналистер үйінде облыстық «Огни Алатау» газетінің бас редакторы, Қазақстан Журналистер академиясының академигі Атсалим Идиговпен кездесу ұйымдастырылды. Шараға Ілияс Жансүгіров атындағы Жетісу мемлекеттік университеті мен Талдықорған политехникалық колледжінің студенттері қатысты.
Кеш барысында Атсалим Идигов студенттерге қиындығы мен қызығы қатар жүретін журналистика мамандығының қыр-сырын кеңінен тарқатып, мемлекеттік тіл жайлы әңгіме өрбітті.
– Қол бастаудан сөз бастау қиын. Журналистика – кез келген адам игере алмайтын мамандық. Қазір ақпарат ғасыры. Халық журналистер не жазады, не айтады екен деп тосып отырады. Сондықтан тілшілер тынбай еңбек етіп, қоғамдағы орын алып жатқан түрлі жаңалықтарды өздері іздеп, жазуы керек. Тағы бір мәселе – мемлекеттік тіл. Мен орыс тілді журналист болғаныммен қазақ тілін жетік меңгергенмін. Қазақтардың ортасында жиі жүремін. Менің елімді, тегімді ешкім сұрамайды. Өйткені, мемлекеттік тілде еркін сөйлеймін, – деді редактор.
Тіл тағдыры – ел тағдыры. Қасиетті мекенде туып-өсіп, өмір сүріп жатқан соң әрбір азамат өз елінің шынайы патриоты болуы керек. Елбасы: «Қазақ қазақпен қазақша сөйлессін», – деді. Кездесуде Атсалим Саламұлы әрбір қазақстандық қазақстандықпен қазақша сөйлесу туралы ұсыныс тастады. «Тіл – ұлттың айнасы, мемлекеттің тірегі. Сондықтан әлемдегі ең бай әрі әуезді ғажап тілде сөйлейік», – деген ол ел болашағы жастардың қолында екенін айтып, студенттерге жылы лебізін білдірді.
Жиын соңында тәлімгерлер кештен ерекше әсер алғандарын айтып, Атсалим Саламұлымен естелік суретке түсті.
Айдар ҚАЛИЕВ
