Лепсі ауылындағы «Ауғанбаев» шаруа қожалығы осы өңірдегі іргелі шаруашылықтардың бірі. Шаруашылық басшысы Бақытжан Амангелдіұлы төрт түлік малды өрбітіп қана қоймай өз төлі есебінен көбейтуде.
– Аллаға шүкір, жыл басы жаман болып жатқан жоқ. Былтыр қажетті жемшөппен толық қамтылдық. Атап айтқанда 2,5 мың орамшөп жинадық, 20 тоннадай жем алдық. Биыл 700 бас қой төлдеуі тиіс. Бүгінге дейін Шопаната түлігінің соңынан қозы ерді. 100 бас ірі қараның жартысы бұзаулады. 200 бас биеден құлын алсақ деп отырмыз. 35 бас түйе боталады, – дейді Бақытжан.
Малсақ жанның алдағы жоспары түйелер мен биелерді сауып, шұбат-қымызбен Лепсі ауылын, Сарқан ауданын қамтамасыз ету. Сөйтіп табиғи таза өнімді тұрғындарға ұсынып, ризашылығын алу. Бақытжан қазір ауылдың 7 отбасын тұрақты жұмыспен қамтуда.
Жақсылық ИГІМАН
Сарқан ауданы
Фото: batys.info
