Цифрлық технологиялардың қарқынды дамуы білім беру жүйесіне де тың өзгерістер әкелді. Бүгінде оқу үрдісі дәстүрлі әдістермен ғана шектелмей, электронды платформалар арқылы толықтырылып келеді. Бұл оқушылардың білімге қолжетімділігін арттырып, оқу материалдарын меңгерудің жаңа тетіктерін қалыптастырды. Осындай заманауи білім беру ресурстарының бірі – TopIQ.kz платформасы.
TopIQ.kz – 1-11-сынып оқушылары мен мұғалімдерге арналған отандық цифрлық жүйе. Платформадағы оқу материалдары мәтіндік ақпаратпен қатар бейне, аудио және интерактивті тапсырмалармен толықтырылған. Мұндай мүмкіндіктер оқушылардың пәнге деген қызығушылығын арттырып қана қоймай, білімді өз бетінше меңгеруіне жағдай жасайды.
Платформаның маңызды бағыттарының бірі – көркем әдебиетті дәріптеу. Әдеби шығарма – ұлттың рухани қазынасы, өскелең ұрпақтың әдеби сауатын қалыптастыратын маңызды құрал. Көркем туындылар арқылы оқушы адамның жандүниесін таниды, адамгершілік құндылықтарды бойына сіңіреді, тіл байлығын арттырып, ойлау қабілетін дамытады. Сондықтан әдебиетке қызығушылықты ерте жастан қалыптастырудың маңызы зор.
Қазіргі уақытта балалардың көпшілігі ақпаратты цифрлық ортадан қабылдайды. Осыған байланысты көркем шығармаларды электронды форматта ұсыну – уақыт талабынан туындаған қажеттілік. Платформада қазақ әдебиетінің таңдаулы шығармаларымен қатар әлем әдебиетінің үздік үлгілері жинақталған. Атап айтқанда, Абай Құнанбайұлының философиялық мұрасы, Мағжан Жұмабаевтың лирикалық поэзиясы, Мұқағали Мақатаевтың жүрекке жылы жырлары, Бердібек Соқпақбаевтың тағылымды шығармалары жас оқырманның ұлттық дүниетанымын қалыптастыруға қызмет етеді. Сонымен бірге әлем әдебиетімен танысу оқушылардың таным көкжиегін кеңейтіп, өзге халықтардың мәдениеті мен рухани құндылықтарын тереңірек түсінуге мүмкіндік береді.
Платформаның тағы бір артықшылығы – білім алушыға өз қарқынымен жұмыс істеуге жағдай жасауы. Қажетті тақырыпты қайта қарап, тапсырмаларды бірнеше рет орындау арқылы оқушы білімін жетілдіріп, оқу нәтижесін жақсарта алады. Бұл өздігінен іздену дағдысын қалыптастырып, жауапкершілік сезімін нығайтады.
Білім беру үдерісін заманауи талаптарға бейімдеген тиімді цифрлық платформа – оқу материалын меңгеруді жеңілдетумен қатар жас ұрпақтың кітап оқуға деген қызығушылығын арттыруға, көркем әдебиет арқылы рухани құндылықтарды бойына сіңіруге және жан-жақты тұлға болып қалыптасуына ықпал етеді.
Айзере СЕРІКҚАН
Алмалы орта мектебінің 9-сынып оқушысы
