7-su.kz. Елде рұқсат беру құжаттарының барлық түрлері проактивті форматқа ауыстырылуға тиіс, яғни мерзімдерін ұзартуға азаматтардан өтінім беруді күтпей, оларды ұзарту автоматты режимде ұсынылады. Мысалы, нотариаттық, адвокаттық және жеке сот орындаушыларының қызметін жүзеге асыруға арналған лицензиялар проактивті форматта ұсынылады.
«ІІМ жоспарына сәйкес азаматтардың жеке басын куәландыратын құжаттардың қолдану мерзімінің аяқталатыны туралы СМС хабарлама сервисін әзірлеу көзделген. 15-ке жуық мемлекеттік көрсетілетін қызметтер композиттік форматқа ауыстырылады және 18 қызмет экс-аумақтық негізде, яғни тұрғылықты мекен жайға қарамастан көрсетіледі. Мысалы, жер учаскелерінің бөлінетіндігі мен бөлінбейтіндігін айқындау жөніндегі қызмет осындай форматта қолжетімді болады», – деді ҚР Мемлекеттік қызмет істері агенттігі төрағасының орынбасары Салауат Мүксімов ОКҚ алаңында өткен баспасөз конференциясында.
Сонымен қатар, қорғаныс, ауыл шаруашылығы, мәдениет, сауда, өнеркәсіп және құрылыс салаларында 9 комиссияның қызметі жойылады.
