ҚР Өнеркәсіп және құрылыс вице-министрі Қуандық Кажкеновтің төрағалығымен кеңес өтті, деп хабарлайды 7-su.kz ақпарттық порталы.
Жиын 2025 жылғы 15 қыркүйектен бастап күшіне енген «Тұрғын үй-коммуналдық шаруашылық, кәсіпкерлік және экспорттық-кредиттік агенттіктің қызметі мәселелері бойынша ҚР кейбір заңнамалық актілеріне өзгерістер мен толықтырулар енгізу туралы» заң нормаларын түсіндіруге арналды.
Кеңес барысында тұрғын үй қоры саласындағы өзін-өзі басқару реформасының 2020 жылдан бері жүзеге асырылып келе жатқаны және оның Мемлекет басшысының ерекше бақылауында екені атап өтілді.
Министрлік өкілдерінің айтуынша, қабылданған өзгерістердің басты мақсаты – көппәтерлі тұрғын үйлерді басқару жүйесінің ашықтығын, тиімділігін және қолжетімділігін арттыру, сондай-ақ тұрғындарға басқару нысанын өз бетінше таңдау құқығын беру болып табылады.
Іс-шараға ҚР Өнеркәсіп және құрылыс министрлігі, «ҚазОрталық» АҚ, сондай-ақ жергілікті атқарушы органдардың өкілдері қатысты.
Кеңес қорытындысы бойынша облыстардың, республикалық маңызы бар қалалардың және астананың әкімдіктеріне бірқатар тапсырмалар жүктелді. Атап айтқанда:
-
жаңартылған заңнама нормаларын өңірлерде тиімді іске асыру;
-
халық арасында түсіндіру жұмыстарын күшейту;
-
тұрғын үй қорына ревизия жүргізу және қолданыстағы ПИК-терді қайта тіркеу;
-
ағымдағы жылдың 1 қарашасына дейін тұрғын үй инспекцияларының интернет-ресурстарында тиісті тізілімдерді орналастыру.
Сонымен қатар, «Тұрғын үй-коммуналдық шаруашылықты жаңғырту мен дамытудың қазақстандық орталығы» АҚ-на заң нормаларының орындалуын бақылау, өңірлерде түсіндіру жұмыстарын жүргізу және халыққа әдістемелік көмек көрсету тапсырылды.
Ал берілген тапсырмалардың орындалуын бақылау ҚР Өнеркәсіп және құрылыс министрлігінің Құрылыс және тұрғын үй-коммуналдық шаруашылық істері комитетіне жүктелді.
