Қазақстан Республикасы Ұлттық ұланының «Оңтүстік» өңірлік қолбасшылығына қарасты әскери бөлімдерінде «Мәңгілік сапта» атты еске алу іс-шарасы ұйымдастырылды. Аталған шара 2022 жылғы Қаңтар оқиғасы кезінде қаза тапқан Ұлттық ұлан сарбаздары – қатардағы Айбат Аманов пен Мадияр Қайсаровты еске алуға арналды.
Іс-шара аясында әскери қызметшілер қаза болған сарбаздардың ерлігіне тағзым етіп, ескерткіш тақталарға гүл шоқтарын қойды, олардың Отан алдындағы адал қызметі мен батылдығын бір минут үнсіздікпен еске алды. Әскери бөлімдерде естелік сөздер айтылып, патриоттық рухтағы тәрбиелік жұмыстар жүргізілді.
Соның ішінде Талдықорған қаласында орналасқан 5514 әскери бөлімінде өткен іс-шара мазмұнды әрі тағылымды түрде ұйымдастырылды. Жеке құрам сапқа тұрғызылып, қаза тапқан жауынгерлердің есімдері құрметпен аталып өтті. Тағзым ету шарасына Ұлттық ұланның ардагерлері және мектеп оқушылары да қатысты.
5514 әскери бөлімінің командирі полковник Амир Мансуров:
– Айбат Аманов пен Мадияр Қайсаров – әскери антқа адалдықтың, Отанға деген шынайы сүйіспеншіліктің жарқын үлгісі. Олардың ерлігі мен жанқиярлығы Ұлттық ұланның әрбір әскери қызметшісінің жадында мәңгі сақталады. Біз батыр сарбаздарымыздың рухы алдында бас иеміз. Елдің ішкі тыныштығы мен қауіпсіздігін сақтау – біздің қасиетті борышымыз», – деп атап өтті.
Айта кету керек, «Мәңгілік сапта» іс-шарасы Ұлттық ұланның жеке құрамына патриоттық тәрбие беру, қаза тапқан сарбаздардың ерлігін ұлықтау және әскери қызметтің маңызын арттыру мақсатында тұрақты түрде өткізіліп келеді.
Қазақстан Республикасы ІІМ Ұлттық ұланы
«Оңтүстік» өңірлік қолбасшылығының баспасөз қызметі
