Үштөбе гарнизонында орналасқан 15603 әскери бөлімінде запастағы әскери міндеттілердің оқу-жаттығу жиыны басталды. Аталған жиынға 100-ден астам запастағы офицерлер мен сержанттық құрам қатысуда.
Жиынның негізгі мақсаты – әскери міндеттілердің жауынгерлік даярлық деңгейін арттыру, әскери мамандықтар бойынша білімдері мен практикалық дағдыларын жетілдіру, сондай-ақ Қарулы Күштердің резервтік құрамын дайындау.
Оқу-жаттығу жиыны екі негізгі кезеңнен тұрады. Бірінші кезеңде қатысушылар жалпы әскери дайындықтан өтеді. Бұл кезең аясында жауынгерлік атыс жүргізу, арнайы техникаларды басқару және оларға техникалық қызмет көрсету бойынша практикалық сабақтар ұйымдастырылады. Сонымен қатар әскери тәртіп, саптық дайындық және қауіпсіздік талаптары бойынша да оқыту жүргізіледі. 
Екінші кезеңде әскери міндеттілер өздерінің әскери мамандықтары бойынша тереңдетілген дайындықтан өтеді. Сабақтар барысында инженерлік-әуеайлақтық қамтамасыз ету және инженерлік бүркемелеу бағыттары бойынша теориялық және практикалық машықтарын жетілдіреді.
– 15603 әскери бөлімінің басшылығы жиынға қатысушылар үшін барлық қажетті жағдайды жасады. Әскери міндеттілер жатын орынмен, үш мезгіл тамақпен және әскери киім-кешекпен толық қамтамасыз етілген. Жиын барысында олар теориялық білімдерін жетілдіріп, практикалық машықтарын шыңдайды, – дейді 15603 әскери бөлім командирінің орынбасары майор Дидар Абишев.
Жиын қорытындысы бойынша қатысушылар инженерлік-әуеайлақ және инженерлік бүркемелік мамандықтарын меңгеріп, өздерінің кәсіби даярлық деңгейін арттырады. Бұл өз кезегінде Қарулы Күштердің мобилизациялық әзірлігін нығайтуға және резервтегі әскери мамандардың біліктілігін жетілдіруге ықпал етеді.
Мұндай оқу-жаттығу жиындары әскери міндеттілердің жауынгерлік қабілетін арттырумен қатар, олардың әскери мамандықтар бойынша заманауи талаптарға сай дайындалуына мүмкіндік береді.
Жетісу гарнизонының баспасөз қызметі
