Жетісуда педагогтердің шығармашылығы мен кәсіби әлеуетін дамытуға бағытталған дәстүрлі «Педагогикалық идеялар» атты облыстық конкурс өтті. Аталған байқауды Жетісу облысының білім басқармасы мен «Әдістемелік орталық» КММ жыл сайын ұйымдастырып келеді.
Конкурстың негізгі мақсаты – педагогтердің инновациялық тәжірибесін насихаттау, шығармашылық әлеуетін ашу және озық педагогикалық идеяларды білім беру кеңістігіне енгізу. Байқау үш кезең бойынша өткізілді: аудандық/қалалық, облыстық және республикалық. Облыстық кезең 2025 жылдың желтоқсан айында ұйымдастырылды.
Байқауға мектеп директорлары мен олардың орынбасарлары, пән мұғалімдері, тәрбиешілер, психологтар, логопедтер, әлеуметтік педагогтер, қосымша білім беру және музыка саласының мамандары жеке форматта қатысты. Қатысушылар TEDx үлгісінде кемінде 7 минуттық «Таратылуға лайықты педагогикалық идеяларын» ұсынды.
Облыстық кезең қорытындысы бойынша түрлі номинациялар бойынша жеңімпаздар анықталды. «Шеберлік палитрасы» бағыты бойынша қоғамдық-гуманитарлық пәндерден Көксу ауданының қазақ тілі мен әдебиеті пәні мұғалімі Арайлым Басанова, жаратылыстану бағытынан Панфилов ауданынан Айдана Раимова физика-математика бағытынан Ақсу ауданынан Нұрғали Сейтпеткалов үздік деп танылды.
Сондай-ақ «Білім беру жүйесіндегі менеджмент» номинациясында Алакөл ауданынан Алмас Турсынбаев, «Шығармашыл толқын» бағыты бойынша Жанна Шынгожанова, қолданбалы цикл пәндерінен Гүлзат Кушербаева, ағылшын тіліндегі жаратылыстану-математикалық бағытта Жарқын Сансызбай, ал «Психолог сандықшасы» номинациясында Жансая Қожабекова жеңімпаз атанды.
Конкурс қорытындысында барлық қатысушылар сертификаттармен, ал жеңімпаздар I, II, III дәрежелі дипломдармен марапатталды. Үздік педагогикалық идеялар алдағы уақытта республикалық кезеңде өңір намысын қорғайды.
«Жетісу-Ақпарат»
