Тылсым дүние мен тұмса табиғаттың жұмыр жүректі жаратылысқа не әзірлеп қойғаны беймәлім. Білсем, көрсем деген құштарлық пен аңсарлық өркениетке қарай жол іздеген пендені алға жетелеп келеді. Зеңгір көкке көз тігіп, сыр алғысы келетін адам ұрпағының қызығушылығында шек жоқ шығар сірә?! Он сегіз мың ғаламның әміршісі де жеті қат көктің есігін ең әлсіз жаратылысы үшін ашып қойғаны ақиқат.
Аспан әлеміне бүлдіршін күннен ынтықпыз. Ғарыштың құпиясын ашып, жер тұрғындарының алдында паш еткіміз келетінін жасырмайтынбыз да. Бұл балаң арманның орындалуы өте қиын екені ес кіргенде мойындалады. Дегенмен, әлемдегі жеті миллиард адамның осы күнге дейін тек 600-і ғарышқа ұшқан екен. Олар онда сан мың рет тәжірибе жасап, ғылымның дамуына өз үлестерін қосты.
Осыдан 64 жыл бұрын Қазақстанның Байқоңыр айлағынан тұңғыш космос кораблі ғарышқа аттанғанда жандарын шүберекке түймеген жан болмаған шығар. Сол шақта адамдар «өзге ғаламшарлар бізге енді бар сырын ашады, аспан әлемін бағындырдық» деп қуанды. Сөйтіп, Юрий Гагарин – әлемнің тұңғыш ғарышкері, ал Байқоңыр ғарыш айлағына айналды. Юрий Гагариннің аспан әлеміне шыққанда «Мен не көріп тұрмын? Бұл түс емес пе? Әлде менің көзім байланды ма?» деген пікір білдіреді. Ал оның бұл сөзін Жаратушы ілім-ғылым дамымай тұрғанда Құран арқылы жеткізген еді.
Тоқтар Әубәкіров қазақтан шыққан тұңғыш ғарышкер. Талғат Мұсабаев қазақтың 2-ші, ал әлемде ғарышқа 3 рет ұшқан 309-шы ғарышкер. Айдын Айымбетов 10 күнге созылған сапарда ғарыштағы 5-ұлттық ғылыми-зерттеу бағдарламасын орындаған 3-ші қазақ ғарышкері атанды. Қазақтың санасында бұл үш тұлғаның аты-жөні мәңгі жаңғырып қала беретіні ақиқат.
Біздің ғарышкерлер күллі ғаламға Абайдың өлеңін, ұлттың намысы мен рухын танытты. Болашақ ұрпақ алдында бабаларының жүзі жарқын екенін көрсетті.
Айбыны асқақ ғарыш әлемінің жұлдыздары, мереке құтты болсын!
Фото: hi-news.ru
