Қазақстандық делегация Сингапурда өтіп жатқан су ресурстары мен қалдықтарды тұрақты басқаруға арналған біліктілікті арттыру бағдарламасына қатысуда, – деп хабарлайды 7-su.kz ақпараттық порталы.
Елімізде су ресурстарын тиімді пайдалану, ысырапты азайту және инфрақұрылымды жаңғырту мәселелері соңғы жылдары ерекше маңызға ие. Осы ретте ҚР Су ресурстары және ирригация вице-министрі Жандос Сәлімов бастаған отандық мамандар сингапурлық әріптестерімен тәжірибе алмасуда. Арнайы білім беру курсы Сингапур Үкіметі ұйымдастырған «Қалалық су ресурстары мен қалдықтарды тұрақты басқару саласындағы көшбасшылық» бағдарламасы аясында өтуде.
Бұл бастама ҚР Су ресурстары және ирригация министрлігі мен Singapore Cooperation Enterprise компаниясы арасында жасалған келісім негізінде жүзеге асырылуда. Аталған құжатқа Сингапур Республикасының аға министрінің Қазақстанға 2026 жылғы 26 тамыздағы ресми сапары барысында қол қойылған болатын. Екі ел арасындағы бұл келісім су шаруашылығын заманауи стандарттарға сай дамытуға жол ашады.
Бағдарлама аясында қазақстандық мамандар Сингапурдың су ресурстарын кешенді басқару жөніндегі озық тәжірибесін егжей-тегжейлі зерделеуде. Әсіресе судың ысырабын азайту, су ресурстарын ұтымды пайдалану, су тасқыны қаупін басқару, экологиялық тұрғыдан тиімді шешімдерді енгізу және су инфрақұрылымын қалалық ортаға кіріктіру сияқты маңызды мәселелерге баса назар аударылуда. Сондай-ақ делегация өкілдері Сингапурдың PUB Ұлттық су агенттігі қызметімен де жақын танысып жатыр.
Жоспарға сәйкес, заманауи тәсілдер мен технологиялардың іс жүзінде қолданылуын көру мақсатында ірі су шаруашылығы нысандарына бару қарастырылған. Практикалық бөлімнен бөлек, Сингапур Республикасының еңбек ресурстары, сауда және өнеркәсіп мәселелері жөніндегі мемлекеттік министрі Фу Чесянмен, Қазақстан Республикасының Сингапур Республикасындағы Төтенше және өкілетті елшісі Асқар Құттықадаммен және бизнес өкілдерімен ресми кездесулер өтті.
Кездесулерде су саласын дамыту, озық тәжірибелерді қолдану және екі ел арасындағы ынтымақтастықты одан әрі нығайту перспективтары талқыланды. Халықаралық тәжірибе мен заманауи шешімдерді енгізу болашақта су тапшылығының алдын алуға кепілдік береді.
«Бағдарлама нәтижелері Қазақстанның су саласына арналған технологиялық және басқарушылық шешімдерді әзірлеу кезінде ескеріледі. Атап айтқанда, судың ысырабын азайту, цифрландыру, су ресурстарын қайта пайдалану және су шаруашылығы инфрақұрылымының тиімділігін арттыру бағыттарына басымдық беріледі», – деді ҚР Су ресурстары және ирригация вице-министрі Жандос Сәлімов.
