«Унисон» тобы жай ғана вокалдық үйірме емес. Бұл – өскелең ұрпақтың ішкі жан дүниесін байытып, ән арқылы туған жерге, ұлтқа, өнерге деген сүйіспеншілікті оятатын рухани мектеп. «Унисон» сөзі музыкалық термин ретінде үйлесім, үндестік деген мағынаны білдіреді. Атауы мен шығармашылық болмысы да үйлескен бұл ұжым түрлі деңгейдегі байқаудың жеңімпазы атанған.
Музыка – баланың дамуына серпін береді. Құдіретті өнер есту, ойлау, қиял, есте сақтау, шығармашылық қабілеттерді де дамытады. «Унисон» тобының вокалдық сабақтары балалардың интонациялық есту қабілетін қалыптастырып қана қоймай, оларды сахна мәдениетіне, бірлесе ән айту әдебіне, эмоциялық әсермен орындауға тәрбиелейді.
Топ мүшелері концерттік қойылымдар мен байқауларға жиі қатысып, туған өлкенің музыкалық мұрасымен танысып, ұлттық өнерге бір табан жақындай түседі. Бұл – нағыз патриоттық тәрбие мен рухани дамудың алтын кілті.
«Унисон» тобы жыл сайын қалалық, облыстық, республикалық, халықаралық деңгейдегі байқауларда жоғары нәтижелерге қол жеткізіп келеді. Атап айтар болсақ, биыл «Жарқын Болашақ» республикалық байқауына қатысып, көпшіліктің арасынан топ жарып, бас жүлдеге ие болды. 2024 жылы «Golden Star» халық-аралық байқауының да үздігі атанды. «Әр бала – Жұлдыз» халықаралық байқауында І орын, 2022-2023 жылдары «Жарық жұлдыз», «Жас талант», «ZHULDYZ ART», «ART BAITEREK», «Дала сазы» байқауларынан да олжасыз оралған емес. 2019-2020 жылдары өнерлі өрендер «Ұлы дала ұрпақтары», «Нұрлы жастар», «Бейбітшілік әлемі», «Премия нового формата» байқауларында бас жүлдені қанжығаларына байлаған. Әсем әндерді тамылжыта орындайтын жеке орындаушылар Ақбота Әсет, Мүбина Нұрқасым, Сәкен Қорлыбаев, Аяна Тілеуберлі, Азия Жұмабай және басқа да дарынды балалар – халықаралық, республикалық деңгейдегі марапат иелері. Аты аталған өнерпаздар қазақтың есті әндерін орындап, халықтың ыстық ықыласына бөленуде.
Жоғарыда атаған жетістік тек қана ұстаз бен шәкірттің табанды еңбегімен, рухани тәрбие мен музыкалық шеберлігімен, ақ адал еңбекпен келген ұлы жеңістер. Олардың алдында әлі талай бағындырар белес көп. Соған жету жолында тынымсыз еңбек етуде.
«Унисон» тобының осы жетістігінің артында балалармен жан-тәнімен жұмыс істейтін, шығармашылық шабытпен бағыт беретін ұстаздың ерен еңбегі тұр. Самал Сабитова баланың дауыс мүмкіндігін ашумен қатар, оның адамгершілік, ұқыптылық, сахнада өзін ұстау мәдениетін де тәрбиелейді. Әсіресе, бүгінгідей жаһандану заманында жас ұрпақты ұлттық құндылықпен, қазақы салт-дәстүрмен сусындатып, рухты тұлғаларды тәрбиелеу де ұстазға үлкен жауапкершілік жүктейді. Сондықтан да «Унисон» – тек ән үйірмесі ғана емес, тұлға қалыптастыру орталығы десек артық айтқандық болмас.
«Унисон» – үндестік пен үйлесімділіктің, өнер мен тәрбиенің, білім мен сезімнің тоғысқан шығармашылық ұжымы. Бұл топ – талай дарынды баланың шабытына қанат бітіріп, үлкен сахнаға жол ашып келе жатқан шынайы өнер мектебі. Олардың әрбір жетістігі – ұлт өнерінің, балалық арманның, ұстаздық еңбектің жарқын көрінісі. Олай болса, жүректен шыққан әндерімен халықтың қошеметіне бөленген ұжымның жұмысына шығармашылық табыс тілейміз.
Еңлік БАУЫРЖАНҚЫЗЫ
