Талдықорғандағы 54380 әскери бөлімінде сарбаздар ант берді. Жас жауынгерлердің Отан алдында адал болуға серт еткен салтанатты шарасы Кеңес Одағының батыры, әйгілі халық қаһарманы, тұңғыш қорғаныс министрі, армия генералы Сағадат Нұрмағамбетовтың 100 жылдық мерейтойына орай ұйымдастырылған.
Шараға ҚР ҚК Құрлық әскерлері байланыс саласының басшысы, полковник Бахытжан Сәрсенбайев, қарулы күштер ардагерлері толыстағы полковник Владимир Шихалев, Ринат Ахметов және сарбаздардың туыс-туғандары мен жақындары қатысып ізгі тілектерін жеткізді.
Жауаптылардың сөзінше, бұл күн жас сарбаздармен олардың ата-аналары үшін де үлкен мереке. Өйткені ант қабылдау адам өмірінде бір рет қана келетін тарихи сәт. Әскерге жаңадан шақырылған жас сарбаздар енді Отан қорғаушы атанды. Бұл жауынгерлер ант қабылдаудың алдында бір ай бойы жалпы әскери дайындықтан өтіп, сапта жүруге жаттықтығып, денелерін шынықтырып, қару-жарақты қолданудың қыр-сырын жан-жақты меңгерген.
Бұл жолғы жас сарбаздардың әскери ант қабылдауына Жетісу және Түркістан облыстарынан арнайы келген ата-аналар ұлдарына ақ жол тілеп, ел үшін адал қызмет ететіндеріне сенім білдірді.
– «Бүгін Отан алдында адал болуға ант бердік, оның өзіндік жауапкершілігі бар. Туыстарымызбен жақындарымыздың сенімін ақтауға тырысамыз. Берген сертімізге сай қызмет етіп, білім мен тәжірибе жинақтаймыз. Біздің ойымызша, бұл бізге болашақта өте қажет, — дейді Түркістан облысынан шақырылған жас сарбаз қатардағы жауынгер Рысдәулет Бүркітбай.
Ант қабылдау рәсімінен кейін бөлім басшылары сарбаздардың ата-аналарымен кездесіп, ұлдары қызмет атқаратын орынның жағдайларымен таныстырды. Сонымен қатар ата-анадар ұлдарының алдағы әскери қызметтеріне байланысты барлық сұрақтарына нақты жауаптарын алды.
Айдын КӘЛІМХАН
