Өңірімізде өскелең ұрпақтың қауіпсіздік мәдениетін арттыруға бағытталған «Жас құтқарушы» облыстық слеті өтті. Іс-шараны төтенше жағдайлар департаменті ұйымдастырды.
Басты мақсаты – жас ұрпақты төтенше жағдайларда дұрыс әрекет етуге баулу, қауіпсіздік мәдениетін қалыптастыру және азаматтық жауапкершілікті арттыру. Шара аясында қатысушыларға құтқарушы мамандығының маңызы мен қоғам алдындағы жауапкершілігі туралы жан-жақты ақпарат берілді.
Слетке облыстың барлық аудан-қаладан келген мектеп оқушыларының командалары қатысты. Олар төтенше жағдайлар кезіндегі теориялық білім, алғашқы медициналық көмек, кедергілер жолағынан өту, шартты апатты аймақта әрекет ету және шығармашылық таныстырылым бойынша сайысқа түсті. Бұл кезеңдер қатысушылардың білімін, физикалық дайындығын және шұғыл шешім қабылдау, топпен жұмыс істеу сынды дағдыларын сынға салды.
– Бұл шара жастардың өзара үйлесім табуы мен бірлікті сезінуіне жол ашады. Құтқарушылар жұмысының маңызын түсіндіру арқылы біз олардың бойында елге қызмет ету рухын оятамыз, – деп қатысушылардың білімі мен физикалық шеберлігінен бөлек топпен бірлесе жұмыс істеу, шешімді жедел қабылдау және қиындыққа төтеп беру қабілеттерінің ескерілетінін атап өтті облыстық ТЖД төтенше жағдайларды жою басқармасының бастығы Қалдыбек Төлеуұлы.
Байқау қорытындысы бойынша жүлделі I орынды Талдықорған қаласы, II орынды Қаратал ауданы, III орынды Кербұлақ ауданы алды. Үздік командалар диплом, медаль және сыйлықпен марапатталды.
«Жас құтқарушы» слеті өскелең ұрпақтың бойына жауапкершілік, табандылық және батылдық қасиеттерін сіңіруге бағытталған маңызды бастама болды.
Санжар СҰЛТАНҒАЗЫ
