«Таза Қазақстан» жалпыұлттық экологиялық акциясы аясында өңір-өңірде игі шаралар қарқын алуда. Осындай бастаманың бірі – «GreenSteppe» атты экологиялық сенбілік Текелі қаласында ұйымдастырылды. Шаһардағы тазалық жұмыс ең ұзын көше Дінмұхамед Қонаев көшесінде өтті. Игі іске «Jetisy Jastary» КММ-ның белсенді мүшелері ұйытқы болды.
Акцияға 20-ға жуық ерікті жастар қатысып, шашылған қоқыстарды жинап, қаланың көркіне көрік қосты. Әсіресе адамдар демалуға жиі жиналатын орындардағы тазалық мәселесі басты назарға алынды. Тұрмыстық қалдықтар, пластик шөлмектер, тамақ жуындысы табиғатқа зиян келтіріп қана қоймай, адам денсаулығына да кері әсер етуі мүмкін. Сол себепті мұндай сенбіліктердің маңызы зор.
– Бұл шараны біз ай сайын, нақты айтқанда, әр айдың 12-сі күні тұрақты түрде өткізіп келеміз. Себебі тазалық бір күндік науқанмен шектелмеуі керек. Жүйелі түрде жүзеге асатын, адамдардың бойына сіңетін күнделікті өмір салтына айналуы қажет, – дейді «Jetisy Jastary» КММ директорының орынбасары Арнай Байжұрынов.
Бұл бастама жастар арасында экологиялық мәдениетті қалыптастыруға, табиғатқа деген сүйіспеншілікті арттыруға бағытталған. Жастар үшін Жер-анаға деген жанашырлықты іспен дәлелдейтін мүмкіндік.
Жалпыұлттық экологиялық акцияға алғаш рет Талдықорған қаласынан облыстық Қазақстан студенттер Альянсының белсенділері келіп қосылды. Альянс төрағасы Ақерке Қызайбайдың айтуынша,мұндайдай бастамалар жастарды біріктіретін күшке айналған.
– Біз бұған дейін көбіне Талдықорғандағы сенбіліктерге қатысып жүрдік. Бірақ табиғатты аялау тек бір қаламен шектелмейтін, бүкіл елді қамтитын үлкен мәселе. Сондықтан біз үшін әр өңірдің, әр көшенің таза әрі көрікті болғаны маңызды, – дейді ерікті төрағасы.
Табиғатты аялап, қоршаған ортаны таза ұстау болашақ ұрпақ алдындағы міндет. Жастардың осы бағытта белсенділік танытуы олардың экологиялық жауапкершілікті сезіне бастағанын көрсетеді.
«Таза Қазақстан» акциясы ел көлеміндегі экологиялық мәдениетті көтеруді көздейтін маңызды қадам. Жастарды белсендіретін шара уақыт өте келе жалпыхалықтық қозғалысқа айналары анық. Себебі, тазалық тек қоқысты тазалау емес, табиғатты сақтауға деген ниет пен жауапкершілік.
Мұндай сенбіліктер арқылы әр азамат туған өлкесіне қызмет етіп, елдің көркеюіне үлес қоса алады. Ең бастысы, бұл тек бір күндік емес, тұрақты түрде жалғасатын өмір салтына айналуы тиіс.
Санжар СҰЛТАНҒАЗЫ
