Жетісу гарнизонында орналасқан 21751 және 18386 әскери бөлімдерінде жастар мен олардың ата-аналарына арналған кең ауқымды «Ашық есік күні» іс-шарасы ұйымдастырылды. Танымдық әрі тәрбиелік мәні зор бұл шараға 100-ге жуық мектеп оқушылары мен студенттер қатысып, әскери өмірдің тыныс-тіршілігімен жақынырақ танысуға мүмкіндік алды.
Іс-шара барысында қонақтар әскери бөлімдердің күнделікті қызметімен таныстырылып, сарбаздардың тұрмыс жағдайы, жатын орындары, асханасы және демалыс аймақтары көрсетілді. Қатысушылар әскери қызметтің тек тәртіп пен жауапкершілікті талап ететін сала ғана емес, сонымен қатар жүйелі ұйымдастырылған өмір салты екенін өз көздерімен көрді.
Әсіресе жастардың қызығушылығын тудырған бөлім – жауынгерлік даярлық үдерісі болды. Олар сарбаздардың тактикалық жаттығуларын, әскери техникалармен жұмыс істеу дағдыларын және жалпы дайындық деңгейін тамашалады. Бұл өз кезегінде қатысушылардың Отан қорғау қызметіне деген құрметін арттыра түсті.
21751 әскери бөлімінде орналасқан Су-30СМжойғыш ұшағы ерекше назар аудартты. Қатысушылар тек ұшақты сырттай көріп қана қоймай, дәл осы әуе техникасының негізінде жасалған арнайы тренажерға отырып, оны басқару мүмкіндігіне ие болды. Бұл сәт жастар үшін ұмытылмас әсер қалдырып, олардың бойында ерекше эмоциялар мен шабыт сыйлады.
Сонымен қатар, іс-шара аясында оқушылар мен болашақ сарбаздар арасында түрлі сайыстар ұйымдастырылды. Атап айтқанда, әскери бөлімде мерзімді әскери борышын өтеп жатқан сарбаздармен бірге кермеге тартылу және АК-74автоматын шашып-жинау бойынша жарыстар өткізілді. Бұл сайыстар қатысушылардың ептілігі мен жылдамдығын сынап қана қоймай, олардың әскери машықтарға деген қызығушылығын арттырды.
Жалпы, «Ашық есік күні» іс-шарасы жастарға әскери қызметтің маңызын түсіндіруде, патриоттық сезімді нығайтуда және болашақ Отан қорғаушыларды тәрбиелеуде үлкен рөл атқарды. Мұндай кездесулер өскелең ұрпақтың ел қорғаны болуға деген ынтасын арттырып, әскери мамандыққа деген қызығушылығын күшейтеді.
Жетісу гарнизонының баспасөз қызметі
