Бұл туралы 7-su.kz ақпараттық порталы BAQ.KZ сайтына сілтеме жасап хабарлайды.
Облыстық полиция департаментінің мәліметінше, 2024 жылдың басынан бері еліміздің барлық өңірінде ювеналдық полиция қызметкерлері білім беру ұйымдарымен бірлесе отырып, 475 рейдтік іс-шара ұйымдастырған. Әсіресе демалыс және мереке күндері бақылау күшейтіліп, тұрғындар арасында ескерту хабарламалары таратылады.
Атқарылған жұмыстар нәтижесінде 2505 құқық бұзушылықтың жолы кесілді. Бұл көрсеткіш өткен жылмен салыстырғанда 24,3 пайызға жоғары. Ең жиі кездесетін құқық бұзушылық – кәмелетке толмағандардың түнгі уақытта заңды өкілдерінсіз көшеде жүруі. Мұндай 2060 дерек тіркеліп, оларға ілесіп жүрген ересектер ҚР ӘҚБтК-нің 442-бабы 2-бөлігі бойынша жауапкершілікке тартылды.
Облыстық ПД жергілікті полиция қызметі басқармасының бастығы Қайсар Мұхметовтің айтуынша, балалардың қауіпсіздігін қамтамасыз ету бағытында ата-аналардың жауапкершілігін арттыру – негізгі басымдықтардың бірі. 2023 жылдың маусым айында Әкімшілік құқықбұзушылық туралы кодекске енгізілген өзгерістерге сәйкес, баласының қауіпсіздігін қамтамасыз етпеген ата-аналарға 10 АЕК көлемінде айыппұл қарастырылған.
Терезеден құлау деректері – басты назарда
Соңғы жылдары балалардың терезеден құлау деректері қоғамды алаңдатып отыр. Өткен жылы республика бойынша мұндай 223 жағдай тіркеліп, өкінішке қарай, 25 бала көз жұмған. Тағы 198 бала түрлі жарақаттармен ауруханаға жеткізілді. Жетісу облысының өзінде 2023 жылы 6 бала терезеден құлап, ауыр жарақат алды. Қуантарлығы, адам өлімі болған жоқ.
Облыстық ТЖД төтенше жағдайлардың алдын алу басқармасының бастығы Ринат Тазабековтың мәлімдеуінше, бұл оқиғалар әсіресе 2–7 жас аралығындағы балалар арасында жиі кездеседі. Мұндай жастағы балалар қауіп-қатерді толық түсіне алмайды. Осыған байланысты, ата-аналарға терезеге қорғаныш құрылғыларын орнату, балаларды қараусыз қалдырмау секілді қарапайым қауіпсіздік шараларын сақтау қажеттілігі түсіндірілуде.
Жыл басынан бері облыс көлемінде 52 көпқабатты үйде профилактикалық жұмыстар жүргізіліп, 587 пәтер қамтылды. 10 билборд орнатылып, 750-ден астам жадынама парақшалары таратылды. WhatsApp топтарында арнайы бейнероликтер мен ескерту хабарламалары таратылып, ата-аналарға қауіпсіздік туралы түсіндіру жұмыстары үздіксіз жүргізілуде.
«Жанұя» орталығы – әлеуметтік қолдаудың жүйелі үлгісі
Балалар арасындағы құқық бұзушылықтың алдын алуда, отбасылық тәрбиені күшейтуде әлеуметтік қолдау құрылымдарының да рөлі зор. Осы ретте «Жанұя» отбасын қолдау орталығы (бұрынғы «Жанұя» әлеуметтік орталығы) тиімді қызметімен ерекшеленіп отыр.
2020–2023 жылдар аралығында орталық қызметіне 7197 азамат жүгінген. Оның ішінде 4090 адамға психологиялық көмек көрсетілсе, 2875 отбасы заңгерлік қолдау алған. Сонымен қатар, 3184 ауызша құқықтық кеңес беріліп, 528 ресми құжат рәсімделген. Заңгерлер 114 жағдайда сот пен мемлекеттік органдарда азаматтардың мүдделерін қорғаған.
2024 жылдың мамыр айында орталықтың атауы өзгеріп, қызмет бағыты сақталған күйде «Жанұя» отбасын қолдау орталығы ретінде жұмысын жалғастыруда. Жаңа атаумен жұмысын бастаған орталық осы жылдың алғашқы тоқсанында 695 азаматқа 824 түрлі қызмет көрсеткен.
Орталықтың басты мақсаты – өмірлік қиын жағдайға тап болған және әлеуметтік осал топтағы отбасыларға психологиялық, құқықтық және әлеуметтік көмек көрсету. Қысқа мерзімді оқыту курстары арқылы аналарды кәсіпке баулу – маңызды бағыттардың бірі. Орталық ашылғаннан бері 409 ана тегін оқудан өтіп, кәсіби сертификат алған. Мамандықтар арасында кондитер, аспаз, массажист, шаштараз, визажист, компьютерлік сауаттылық және маникюр-педикюр курстары қамтылған.
Қоғамдық жауапкершілік – басты қағида
Мамандардың пікірінше, баланың қауіпсіздігін қамтамасыз ету – тек құқық қорғау органдарының немесе құтқару қызметтерінің емес, әрбір азаматтың, әрбір ата-ананың ортақ жауапкершілігі.
Бір сәттік немқұрайлылық – орны толмас өкінішке себеп болуы мүмкін. Сондықтан балалардың қауіпсіздігін қамтамасыз ету мақсатындағы алдын алу шараларын күшейту, ата-аналардың санасында сақтық пен жауапкершілік ұғымын орнықтыру – бүгінгі күннің өзекті міндеті болып қала бермек.
