Өңірде теңдесі жоқ нысан бой көтермек. Республикада үшінші болып облыста инклюзивті спорт кешенінің іргесі қаланды. Талдықорған қаласында өткен салтанатты шарада аймақ басшысы Бейбіт Исабаев, «Қазақстан халқына» қорының басқарма төрайымы Ләззат Шыңғысбаева және мүмкіндігі шектеулі спортшылар Уақыт капсуласын салды.
Жиында сөз сөйлеген өңір басшысы Мемлекет басшысы жүктеген міндеттерге сәйкес қолға алынған бұл жоба өңірдегі параспортты дамытуға тың серпін беретінін атап өтті. Оның айтуынша, жаңа кешенде 22 спорт түрімен кәсіби деңгейде шұғылдануға мүмкіндік жасалады. Осындай оңтайлы бастаманы жүзеге асыруға мүмкіндік берген «Қазақстан халқына» қорының жетекшілеріне алғаусыз алғыс білдірді.
– Өңірде параспорт қарқынды дамыған. Облыс құрылғаннан бері параспортшыларымыз түрлі деңгейдегі жарыстарда жалпы саны 1300-ден астам медаль иеленді. Мен барлық параспортшыларға өмірдің түрлі қиындықтарына мойымай, спортпен айналысып, Қазақстанның атын шығарып, көк туымызды желбіретіп жүргені үшін үлкен алғысымды айтамын. Біз бұдан былай да параспортты ары қарай дамытуды жалғастырамыз, – деді облыс әкімі.
Өз кезегінде қор басшысы Ләззат Шыңғысбаева бұл жоба мүмкіндігі шектеулі азаматтар үшін қолжетімді орта қалыптастырудағы маңызды бастама екенін айтты. Бұған дейін осындай орталықтар Астана мен Қызылордада салынғанын атап өтіп, Талдықорғандағы нысан үшінші жоба екенін жеткізді. Оның ішінде тек спорттық залдар ғана емес, оңалту және медициналық бөлімдер де қарастырылмақ. Сондай-ақ, Ләззат Шыңғысбаева қор қаржысы есебінен Үштөбе қаласында тағы бір спорт кешені салынатынын сүйіншіледі.
– Бұл жоба әр адамның, физикалық мүмкіндіктеріне қарамастан, өз әлеуетін ашуына, денсаулығын нығайтуына және белсенді қоғамдық өмір сүруіне мүмкіндік беретін қолжетімді әрі әділ ортаны қалыптастыру жолындағы маңызды қадам. Спорттық нысан ерекше қажеттіліктері бар адамдардың спортпен тұрақты түрде айналысуға тартылуын арттыруға, олардың физикалық және психологиялық денсаулығын нығайтуға, сондай-ақ әлеуметтік бейімделу мен қоғамдық өмірге қатысу мүмкіндіктерін кеңейтуге мүмкіндік береді, – деді ол.
Салтанатты жиында сөз алған парапауэрлифтингтен халықаралық деңгейдегі спортшы, Паралимпиада ойындарының жүлдегері Раушан Қойшыбаева мұндай қолдау мүмкіндігі шектеулі жандар үшін үлкен мотивация екенін атап өтті. Оның айтуынша, жаңа орталық спортшылардың жоғары деңгейде дайындалуына қолайлы жағдай жасайды.
Болашақ спорт кешеннің жалпы аумағы 2 641 шаршы метрді құрайды. Кешен құрамында әмбебап спорт залы, арнайы жаттығу алаңдары, күрес және күштік дайындық залдары, оқ ату және садақ ату алаңдары, сондай-ақ медициналық блок қарастырылған. Нысан толықтай кедергісіз орта талаптарына сай жобаланып, бір мезгілде 150 адамға дейін қабылдай алады. Сонымен бірге ғимаратта мүмкіндігі шектеулі азаматтарға арналған арнайы лифт орнатылады. Негізінен жоба ерекше қажеттілігі бар жандарды спортқа кеңінен тартуға, олардың денсаулығын нығайтуға және қоғамға бейімделуіне оң ықпал етеді.
Айта кететін жайт, бүгінде «Дене мүмкіндіктері шектеулі тұлғаларға арналған спорттық даярлау орталығы» КММ-інде мүмкіндігі шектеулі 360 жетісулық спорттың 24 түрімен айналысады. Олардың басым бөлігі түрлі спорттық атақтар мен разрядтардың иегерлері. Өңір намысын халықаралық деңгейде қорғап жүрген спортшылар қатарында Раушан Қойшыбаева, Рамазан Әбдрасіл және Рахметжан Хамаевтар бар.
Дастанбек САДЫҚ
