Қазақстан халқы Ассамблеясының 30 жылдығына орай Талдықорған қаласындағы «Достық үйі» маңынан жаңа аллея ашылды. «Достық аллеясының» ашылу салтанатына облыс басшылығы, Ассамблея өкілдері, жастар қатысып, уақыт капсуласын қойды.
Іс-шара барысында қатысушылар аллеяға 30 түп катальпа ағашының көшетін отырғызды. Облыс әкімінің орынбасары Диас Есдәулетов, қоғам қайраткері Атсалим Идигов және белсенді жастар қатарынан Екатерина Подгорная болашаққа бағытталған тілек жазылған уақыт капсуласын орналастырды. Уақыт капсуласы 2030 жылы, яғни Қазақстан халқы Ассамблеясының 35 жылдығында алынып, оқылатын болады.
І. Жансүгіров атындағы университеттің Қазақстан халқы Ассамблеясы кафедрасының меңгерушісі Бархудар Гусенов шарада сөз сөйлеп, отырғызылған көшеттердің символикалық мәнін атап өтті:
«Бүгінгі отырғызылған 30 көшет кездейсоқ таңдалған жоқ. Бұл – Ассамблеяның 30 жылдық тарихындағы татулық пен тұрақтылықтың, түрлі этностардың бір шаңырақ астында бейбіт өмір сүріп келе жатқанын білдіретін символ. Әр отырғызылған тал – табиғатқа деген қамқорлықтың ғана емес, ел болашағына қалдырылған рухани мұраның, үміттің де көрінісі. Ал «Болашаққа хат» уақыт капсуласының салынуы – бүгінгі ұрпақтың ертеңгі күнге деген сенімі, елдің болашағына аманат еткен жүрек сөзі», – деді ол.
Аталмыш аллея Талдықорған қаласының халық демалатын көрнекті орындарының біріне айналмақ. Шара соңында қатысушылар естелік суретке түсіп, ақсақалдар ұйымдастырушылар мен жастарға ақжолтай тілектерін білдірді.
Жетісу облысы әкімінің баспасөз қызметі
