Талдықорғанда жыл сайын дәстүрлі түрде ұйымдастырылатын Қазақстан халқы Ассамблеясының «Шаңырақ» этножурналистика саласындағы шығармашылық байқауының облыстық жеңімпаздары марапатталды.
Шаһардағы Салтанат сарайында өткен арнайы шарада сөз алған облыстық «Қоғамдық келісім» мемлекеттік мекемесінің басшысы Еркебұлан Ақболатов байқауда топ жарған БАҚ өкілдерін жетістіктерімен құттықтап, ізгі тілегін жеткізді.
Еркебұлан Ешмұхамбетұлының сөзінше, бұл байқау еліміздегі келісім мен қоғамдық бірлікті нығайтуға, үздік шығармаларды анықтауға және этножурналистика бағытындағы кәсіби шеберлікті көтеруге бағытталған. Мұнда мемлекеттік және орыс тілінде жазылып, түрлі ақпарат құралында жарияланған, телеарналардың эфирінде көрсетілген жұмыстар ғана қаралған. Байқауға келіп түскен мақалаларды арнайы білікті журналистерден құралған қазылар алқасы жан-жақты сараптап, үздіктерді анықтаған. Бір ерекшелігі — биыл байқаудың ауқымы ұлғайтылып, бірнеше аталым бойынша қарымды қалам иелеріне бірдей жүлде тағайындалған.
– Жұртқа мәлім, биыл Қазақстан халқы Ассамблеясына 30 жыл. Сонықтан осы бір мерейлі мереке аясында өткізілген бұл жолғы байқаудың мәні де, орны да ерекше. Ал оның басты мақсаты — көпұлтты Қазақстанның рухани бірлігін, тілдік және мәдени әралуандығын насихаттау, ел бірлігі мен ұлт құндылықтарын ақпараттық кеңістікте кеңінен дәріптеу. Осыған сай жарысқа аймақтағы республикалық және өңірлік бұқаралық ақпарат құралдарының қызметкерлері қатысып, жүзден жүйрік, мыңнан тұлпар шыққандар анықталып отыр. Жеңімпаздарды жүлделі орындарымен құттықтап, жалпы қаламгерлерге шығармашылық табыс тілеймін, – деді.
Осыдан соң бірнеше номинация бойынша жүлдегерлер марапатталып, жеңімпаздарға арнайы диплом және қаржылай сыйақының сертификаттары табысталды. Шара соңы әр ұлт өнерпаздарының концерттік бағдарламасына ұласты.
Айдын КӘЛІМХАН
