Жетісу облысында балық өнімдерін заңсыз экспорттау деректері әшкереленді. Бұл туралы ҚР Бас прокуратурасының баспасөз қызметі хабарлады.
Табиғатты қорғау прокуратурасының талдауына сәйкес, жергілікті балық шаруашылығы кәсіпорындары Еуропа елдеріне мыңдаған тонна өнімді заңсыз шығарған. Уәкілетті органның мәліметінше, төрт балық шаруашылығы және олардың еншілес фирмалары мемлекетке 80 млрд теңгеден астам залал келтірген.
Тергеу барысында аталған кәсіпорындар 20-дан аса еншілес компания құрып, солардың атынан өнімді шетелге жөнелткені анықталды. Алайда бұл фирмалардың ешқайсысында су айдындары, балық аулау квоталары және ресми экспорт рұқсаттары болмаған.
Мәселен, бір серіктестікке белгіленген лимит 270 тонна болса, іс жүзінде 4920 тонна балық экспортталған. Бұл – рұқсат етілген көлемнен 18 есе артық. Оның ішінде 2096 тоннасы еншілес компаниялар арқылы сыртқа шығарылған.
Қазіргі таңда аталған фактілер бойынша ҚР Қылмыстық кодексінің 234-бабы (экономикалық контрабанда) бойынша сотқа дейінгі тергеу басталды.
.
