Елімізде 3-қыркүйек ресми түрде Қазақ тазысы күні болып белгіленіп, ұлттық құндылығымызды ұлықтаудың жаңа кезеңі басталды, – деп хабарлайды 7-su.kz ақпараттық порталы.
Ұлттық мұраны ұлықтау мен байырғы үй жануарларының генетикалық қорын сақтау – тарихи жадымызды жаңғыртудың басты қадамы. Көшпелі бабаларымыздың сенімді серігіне айналған, жеті қазынаның бірі саналатын тазы тұқымы тек аңшылық құралы емес, халқымыздың мәдени бірегейлігінің ажырамас бөлшегі. Соңғы жылдары бұл бірегей тұқымды халықаралық деңгейде заңдастыру және оның таза қандылығын сақтау бағытында мемлекет тарапынан жүйелі шаралар қолға алынды. Аталған бастама асыл тұқымды жануарларды қорғауға, сонымен бірге еліміздің халықаралық кинеологиялық қоғамдастықтағы беделін арттыруға мүмкіндік береді.
Бұл айтулы датаның белгіленуі Халықаралық кинеология федерациясының (FCI) 2024 жылғы 3-қыркүйектегі тарихи шешімімен тығыз байланысты. Сонда аталған ұйым қазақ тазысын ұлттық тұқым ретінде алдын ала мойындап, №372 халықаралық стандартын бекіткен еді. Осылайша, Қазақстан аталған тұқымның шыққан отаны ретінде ресми танылды. Қазіргі таңда Қазақстан Кинологтар одағының Бірыңғай асыл тұқымдық кітабында 4 мыңға жуық тазы тіркелген. Олар дүниежүзілік көрмелерде ел намысын абыроймен қорғап келеді.
Елімізде ұлттық ит тұқымдарын сақтау мен көбейтудің 2026-2036 жылдарға арналған кешенді жоспары белсенді түрде жүзеге асырылуда. Әсіресе Жетісу облысында Қазақ ит тұқымдарының ұлттық орталығын құру жобасы ерекше мәнге ие. Бұл орталық селекциялық жұмыстарды ғылыми негізде жүргізіп, тазының жұмысшылық әрі табиғи қасиеттерін дамытуға ықпал етеді. Халықаралық федерацияның түпкілікті толық мойындауына қол жеткізу үшін отандық мамандар бірнеше буын бойы тұқымның генетикалық тұрақтылығын дәлелдеу бойынша жауапты міндеттерді атқаруда.
Тазы тұқымын өркендету – ата-бабамыздан жеткен асыл қазынаны келешек ұрпаққа аманаттаудың жарқын көрінісі. Ұлттық итті өсіру, табиғи қабілетін сақтау және халықаралық аренада дәріптеу бағытындағы жұмыстар алдағы уақытта да қарқынды түрде жалғасады.
