Әдеби жиынға облыс әкімінің орынбасары Диас Есдәулетов қатысып, кітаптары оқырманға жол тартқан қаламгерлерге ізгі лебіз білдірді. Өз сөзінде ол бұл бастаманың жыл сайын жалғасын тауып келе жатқан игі дәстүр екенін атап өтті. Облыс әкімі Бейбіт Исабаевтың тікелей қолдауымен жүзеге асып отырған жоба жергілікті ақын-жазушылар шығармашылығын насихаттауға серпін беріп, өңірдің рухани кеңістігін байытып отырғанын жеткізді. Сондай-ақ, жаңа еңбектердің жарық көруі – әдеби орта үшін үлкен қуаныш екенін айтып, авторларды шын жүректен құттықтады.
Салтанатты рәсім барысында Қазақстанның еңбек сіңірген қайраткері Әли Ысқабайдың «Жұмбақтар мен жаңылтпаштар», «Түйсік түйіндері», Анарбай Бұлдыбайдың «Жетісудың жыр дүлдүлі – Бақтыбай Жолбарыс-ұлы», Халықаралық «Алаш» әдеби сыйлығының иегері, жазушы Нұрила Бектемірованың «Жетісудың қыздары-ай!», Қазақстанның еңбек сіңірген қайраткері Жарылқап Бейсенбайұлының «Шоқан» және жас ақын Лида Жанботаның «Ақ бұлақтың сылдыры» Әлия Төлегенованың «Суретшінің кітап әлемі» атты кітаптарының тұсауы кесілді. Әрбір еңбек мазмұны мен тақырыптық ауқымына қарай оқырманға ой салатын, танымдық әрі тағылымдық құндылығымен ерекшеленеді.
Әдеби кешке қатысқан облыстық ақсақалдар алқасының төрағасы Ермек Келемсейіт пен Халықаралық «Алаш» әдеби сыйлығының иегері, ақын Әміре Әрін жаңа басылымдарға ақ жол тіледі. Олар өңір қаламгерлерінің еңбектері ұлттық руханиятқа қосылған салмақты үлес екенін атап өтіп, шығармашылыққа қолдау көрсетудің маңызын тілге тиек етті.
Жиында сөз алған жазушы Нұрила Бектемірова жарық көрген еңбегінің мазмұнына тоқталып, облыс басшылығына алғысын білдірді. Оның айтуынша, «Жетісудың қыздары-ай!» атты кітапта өңір тарихындағы дара тұлғалы аналардан бастап, актриса Бикен Римова, ақын Қанипа Бұғыбаева, әнші Зейнеп Қойшыбаева секілді өнер мен ғылым жолына саналы ғұмырын арнаған жандардың өмірі мен өнегесі жинақталған. Осы еңбектің баспадан шығуына қолдау көрсеткен облыс басшысы Бейбіт Өксікбайұлына қаламгер ерекше ризашылығын жеткізді.
Мазмұны бай, тағылымы терең бұл басылымдар Жетісу өңірінің әдеби-мәдени тынысын кеңейтіп, оқырман қауымның рухани сұранысын қанағаттандыратын құнды дүниелер қатарына қосылды.
Санжар СҰЛТАНҒАЗЫ
