Жетісу облысында 1 қазаннан бастап жаңа эпидемиялық маусым басталады. Мамандардың айтуынша, тұмау мен жіті респираторлық вирустық инфекциялардың (ЖРВИ) көтерілуі қараша айынан басталып, қаңтар-ақпан айларында өзінің шарықтау шегіне жетпек.
Бейсен Құранбек атындағы Журналистер үйінде өткен баспасөз мәслихатында өңірдегі эпидемиологиялық жағдай мен алдағы дайындық шаралары сөз болды. 2025-2026 жылдардағы эпидмаусымда облыс бойынша ЖРВИ-дің 179 648 жағдайы тіркеліп, сырқаттану деңгейі өткен жылмен салыстырғанда 12,3%-ға жоғарылаған. Ал зертханалық жолмен дәлелденген тұмау жұқпасының 220 жағдайы тіркелген.
Жетісу облысы санитариялық-эпидемиологиялық бақылау департаменті басшысының орынбасары Индира Күнбасова өңірдегі профилактикалық шаралар мен санитариялық талаптың барысы туралы баяндады.
Жаңа маусымға дайындық жұмыстары жүйелі түрде жүріп жатыр. Сырқаттануға мониторинг жүргізу апта сайын қолға алынады, ал 1 қазаннан бастап күнделікті бақылауға ауысады. Біз үшін басты міндет – вирус түрін уақытылы анықтау. Мектептерде санитайзерлер орнатылады. Егер бір инкубациялық кезеңде сыныптағы оқушылардың 20-30%-ы ауырса, кабинеттік оқыту тоқтатылады. Ал сырқаттанғандар саны 30%-дан асса, оқушылар онлайн форматына ауыстырылады, – деді Индира Күнбасова.
Денсаулық сақтау саласының мамандары жұқпалы аурумен күресудің ең тиімді жолы – иммундау екенін алға тартады. Жетісу облысы денсаулық сақтау басқармасы басшысының орынбасары Сымбат Кульбаева медициналық ұйымдардың дайындығы мен вакцинация барысына тоқталды:
2026-2027 жылдардағы эпидемиялық маусымға жергілікті бюджет есебінен 80 000 доза «Гриппол плюс» вакцинасы сатып алынды. Ең алдымен қауіпті топқа жататын азаматтар, яғни медицина қызметкерлері, 2-3 триместрдегі жүкті әйелдер, созылмалы ауруы бар азаматтар, жиі ауыратын балалар мен жабық мекеме тәрбиеленушілері тегін екпе алады. Медициналық мекемелерде 1 қазаннан бастап маска режимі енгізіледі. Сондай-ақ тұрғындарға ыңғайлы болу үшін емханаларда сүзгілер ұйымдастырылып, үйге шақырулар кезінде 1 жасқа дейінгі балалар мен қарттарға басымдық беріледі. Сала бойынша қосымша 201 инфекциялық орын ашу жоспарланған, – деп атап өтті спикер.
Дәрігерлер аурудың алғашқы белгілері байқалғанда өз бетінше емделмей, бірден емханаға жүгіну қажеттігін ескертеді. Сондай-ақ гигиена ережелерін сақтау, бөлмені жиі желдету, адам көп жиналатын орындарда бетперде тағу сырқаттың алдын алады.
Мақпал Әділханқызы
