Жетісу облысының көмір қоймаларына қатты отын тиісті көлемде тұрақты жеткізілуде. Қазір өңірге тәулігіне орта есеппен 38 вагон немесе 2,6 мың тонна көмір әкелінеді. Жалпы биылғы жылыту маусымына облыста халықтың көмірге деген қажеттілігі 397 мың тоннаны құраса, бүгінгі күнге жетісулықтар 328,2 мың тонна көмір сатып алды.
Облыстық энергетика және тұрғын үй-коммуналдық шаруашылығы басқармасының мәліметіне қарағанда, өңірдегі аудан-қалаларда жоспарға сәйкес 343,4 мың тонна көмір немесе қажетті көлемнің 83,3% дайындалған, соның 328,2 мың тоннасы халыққа сатылды, қазір қоймалар мен тұйықтарда 19,7 мың тонна бар көмір бар.
«ҚТЖ – Жүк тасымалы» ҰК» АҚ тарапынан халыққа көмір дайындау жоспарын орындау бойынша күнделікті мониторинг жүргізіледі. Біздің облысқа орташа есеппен тәулігіне 38 вагон, атап айтқанда 18 вагон «Шұбаркөл», 20 вагон «Қаражыра» көмірі жеткізіліп отыр, яғни көмір жетіспеушілігі жоқ. Күз-қыс айларында сұраныс күрт өсетіндіктен, көмірге кезек, тасымалдау кідірістері, тапшылық сияқты қиындықтарды болдырмау мақсатында аудан, қала әкімдіктері тарапынан қолайлы ауа райында көмір сатып алу туралы халық арасында түсіндіру жұмыстары тұрақты жүргізіліп келеді. Жалпы облыс аумағында жылыту маусымы штаттық режимде өтуде», – делінген басқарманың хабарламасында.
Атап өтсек, облыс бойынша 44 көмір тұйығы мен қойма бар.
Жетісу облысы әкімінің баспасөз қызметі.
