Жетісу облысында 2023–2025 жылдарға арналған экологиялық проблемаларды кешенді шешуге бағытталған жол картасы іске асырылуда. Жол картасында 7 нақты іс-шара көзделген, оның бесеуі орындалуы тиіс болса, екеуі кезең-кезеңімен жүзеге асырылуы жоспарланған.
Негізгі бастамалар мен атқарылған жұмыстар
-
«Басқуат» қазандығын жаңғырту: Талдықорған қаласындағы 1978 жылдан бері жұмыс істеп келе жатқан «Басқуат» қазандығының тозу деңгейі 85%-ға жеткен. Қазанды газға ауыстырып, қуаттылығын сағатына 210-нан 310 Гкал-ға дейін арттыру жоспарланған. Бұл жобаға 2023–2024 жылдарға 524,2 млн теңге көлемінде қаржы бөлінген.
-
Газдандыру жұмыстары: Облыстың 192 елді мекенін 2030 жылға дейін газдандыру көзделіп отыр. 2024 жылы газ тарату желілерінің жалпы ұзындығы 433 км болатын тағы 30 елді мекенді қосу жоспарланған.
-
Текелі қалдық қоймасын қалпына келтіру: 1965 жылдан 2012 жылға дейін пайдаланылған Текелі қалдық қоймасы 134,9873 га аумақты қамтиды. Қалпына келтіру жұмыстары экологиялық тепе-теңдікті қалпына келтіруге бағытталған техникалық және биологиялық кезеңдерді қамтиды.
-
Қатты тұрмыстық қалдықтар полигондары: Ақсу, Алакөл және Сарқан аудандарында жаңа полигондар салу және қолданыстағыларын рекультивациялау жоспарланған. Жобалық-сметалық құжаттамалар бекітілген мерзімдерге сәйкес әзірленуде.
-
Экологиялық мониторинг және білім беру: Ауаның, судың және топырақтың ластануын жүйелі түрде бақылау жүргізілуде. Сонымен қатар, экологиялық білім беру бағдарламалары әзірленіп, қоғамдық кеңестер өткізіліп, жергілікті тұрғындардың қатысуы қамтамасыз етілуде .
Жалпы экологиялық ахуал
Жетісу облысында экологиялық жағдай салыстырмалы түрде қолайлы. Ластаушы заттардың нақты шығарындылары 10,8 мың тоннаны құрап, өткен жылмен салыстырғанда 6,4%-ға төмендеген. Алайда, қайта өңдеу және кәдеге жарату үлесі 5,6% деңгейінде қалып отыр, бұл көрсеткішті арттыру қажеттігін көрсетеді.
«Жетісу-Ақпарат»
Фото: Олжас Құрмашев
