Жетісу облысында Ұлттық ұланның әскери қызметшілері қоршаған ортаны қорғауға үлес қосты. Олар «Таза Қазақстан» акциясы шеңберінде облыс орталығында ауқымды сенбілік ұйымдастырды.
Жетісу облысында Ұлттық ұланның жеке құрамы «Таза Қазақстан» республикалық экологиялық акциясына белсене қатысты. Жүзден астам сарбаз әскери бөлім аумағын және оған іргелес аймақтарды қоқыстан тазартуға, көшелер мен қоғамдық орындарды абаттандыруға жұмылдырылды.
Сенбілік барысында жауынгерлер қоқыс жинау жұмыстарымен қатар, жасыл желектерді суару және күтіп-баптау ісіне де атсалысты. Сондай-ақ ағаштар мен гүлдер отырғызылып, көпшілік жүретін орындардың санитарлық жағдайы жақсартылды. Ұландықтар тұрғындарды қоршаған ортаға ұқыпты қарауға шақырды.
Шараның негізгі мақсаты – жауынгерлердің экологиялық мәдениетін арттыру, табиғатты қорғаудың маңыздылығын ұғындыру және жастарды қоршаған ортаны аялауға тәрбиелеу. Ұйымдастырушылардың айтуынша, мұндай экологиялық бастамалар сарбаздар арасында экосана қалыптастыруға және азаматтық жауапкершілікті күшейтуге ықпал етеді.
Шара барысында бөлім командирі полковник Әмір Мансұров сөз сөйлеп, экологиялық мәдениетті дамыту туралы пікірін білдірді: «Табиғатты қорғау арқылы біз келешек ұрпаққа таза әрі қауіпсіз орта қалдырамыз. Бұл – әрбір азаматтың борышы. Сенбілікке қатысу – өзіміз тұратын өңірге деген жанашырлықтың нақты көрінісі», — деді ол.
«Таза Қазақстан» акциясы аясында Жетісу өңірінде алдағы уақытта тағы бірнеше экологиялық іс-шара ұйымдастырылмақ. Ұлттық ұланның әскери қызметшілері табиғатты қорғау ісіне өз үлестерін қоса бермек. Сонымен бірге олар барша тұрғындарды қоршаған ортаны таза ұстауға және экологиялық бастамаларға белсенді қатысуға шақырды.
ҚР ІІМ Ұлттық ұланы «Оңтүстік» өңірлік қолбасшылығының баспасөз қызметі
